OPLAN Bulabog 24 oras na aron ma limitahan ang lihok sa mga tawo panahon sa kagabhion nunot sa pagsaka pag-ayo sa mga kaso sa coronavirus disease 2019 (Covid-19) sa dakbayan sa Sugbo nga naka paalarma na sa Cebu City Police Office (CCPO).
Sa data sa Emergency Operations Center (EOC) sa Siyudad sa Sugbo nga gipahibawo ni Konsehal Joel Garganera, kapin sa 1,200 na ang nagpositibo sa Sars-CoV-2, kagaw sa Covid-19, sulod lang sa usa ka adlaw.
Kini maoy labing taas nga natala sa dakbayan sukad misulod ang Covid-19 niadtong 2020.
Tungod niini, mas pahugtan pa sa kapulisan ang pagpatuman sa minimum health standard sa siyudad pinaagi sa paghimog 24 oras nga Oplan Bulabog.
Matod ni Police Lieutenant Colonel Wilbert Parilla, deputy city director for operations sa CCPO, nga ang gidugang nga personnel gikan sa Regional Mobile Force Battalion (RMFB 7) nga moabot sa 150 maoy mopatuman sa lagda nga giluwatan ni Cebu City Mayor Michael Rama.
Sukwahi sa nanglabay nga mga semana nga mahunong nila ang Oplan Bulabog tungod sa uban nga mga gimbuhaton sama sa anti criminality operations, karon motutok na ang maong mga pulis sa pagpatuman sa health protocol.
“Unlike man gud before ang atoang mga police is multi-tasking right after mag conduct silag recorida Oplan Bulabog, mobalik nasad sila sa anti criminality. So mao nang dunay span of time nga mabiyaan nato ang atong Bulabog,” matod ni Parilla.
Sa dili pa ang alas 11 sa gabii , ang mga pulis mo-roving na sa mga imnanan ug mga sudlonong bahin sa kabarangayan aron mag recorida.
Sila magpahibawo nga kinahanglan nga inig oras na sa curfew sirado na ang tanang mga establisemento ug naka pauli na ang mga tawo sa ilang tagsa-tagsa ka panimalay.
Kay kon aduna pay mag abli sa maong oras, mamahimo silang i-report sa Business Permit and Licensing Office (BPLO) sa Cebu City Hall aron mapadad-an og show cause order.
Ang nahabilin nga mga nanag inom dakpon na nunot sa kalapasan sa executive order sa mayor.
NAKASIKOP NA SAB
Samtang moabot sa 220 ka mga tawo ang nadakpan sa kapulisan sa siyudad atol sa gipatuman nga Oplan Bulabog sa Huwebes sa gabii ug Biyernes sa kaadlawon.
Ang 191 kanila mga hamtong na ug 29 ang mga menor de edad nga gi rescue sa mga operatiba.
Sa 220 nga nasikop, 153 ang nakalapas sa curfew ug 68 ang walay facemask. Hinuon wala silay nadakpan sa liquor ban.
Gipahibawo ni Parilla nga mas gipahugtan pa nila karon ang Oplan Bulabog aron limitahan ang lihok sa mga tawo ug mo ubos na ang kaso sa Covid sa dakbayan.
“Kada gabii man nato ni gibuhat. But karon ato nasad ni gihingusgan og balik considering nga nagka taas napud og maayo ang atoang positive cases especially kining bag-o nga variant nga Omicron,” dugang ni Parilla.
Matod ni Parilla nga kon padayon nga mag magahi ang publiko sa pag sunod sa mga lagda sa Kagamhanan sa Dakbayan, mosaka pag ayo ang mga kaso ug mobalik na usab sa labing estrikto nga alert level ang Siyudad, butang nga dili sila maka tugot.