DUHA ka mga sakop sa gun-for-hire ug tigpayuhot og gidiling drugas ang nasikop sa mga operatiba sa Police Drug Enforcement Group (PDEG)-Visayas Special Operations Unit (SOU-7) niadtong Huwebes, Enero 20, alas 8:00 sa gabii sa dalan Waling-waling, Phase 4 St. Jude Acre sa Barangay Bulacao, siyudad sa Sugbo.
Si Police Major Alejandro Batobalonos, Deputy Regional Chief sa PDEG-Visayas (SOU-7), nangulo sa pagronda, nagkanayon nga ang nasikop mao sila si Jamil Opeña Espinosa, 35, ug Ariel Ybañez, 24, pulos molupyo sa Barangay Inayawan, siyudad sa Sugbo.
Atol sa anti illegal drug operation, nasakmit gikan sa duha ang shabu nga motimbang og 115 gramos nga mobalor sa P782,000 mil subay sa iyang street dug price value (SDPV).
Samtang nakuhaan usab gikan kanila ang armas nga 38 revolver nga dunay duha ka bala ug usa ka kalibre .45 nga armas nga dunay unom ka mga buhing bala.
Si Batobalonos nibutyag nga ang duha nilang nadakpan mga sakop ni anhing Dee Jay Bas alyas Adoy, kinsa napatay kauban sa laing duha pa nga sila Ernie Gasalatan Sales, 39, ug Mark Aventurado alyas Mark, 16, pulos taga Inayawan sa miaging tuig atol sa operasyon batok sa gun-for-hire ug gidiling drug. Dako ang pagtuo ni Balobalonos nga lakip kining duha sa posibleng responsable sa mga sunodsunod nga kaso sa pagpamusil sa Inayawan.
“Ato ning ipa-cross matching ang ilang armas aron makabalo ta nagamit ba ni sa mga nahitabong pusil sa Inayawan,” matod ni Batobalonos.
Samtang sila si Esponas ug Ybañez sa ilang depensa ningimakak ga nalambigit sila sa mga nahitabong pusil sa Ina_yawan.
Matud pa ni Espinosa nga bisan usa, wala siyay record sa pagpatay sa Barangay Inayawan subay sa alegasyon sa kapulisan.