ANG Department of Health (DOH) nitaho nga dunay kinatibuk-ang 22,958 ka mga bag-ong kaso sa Covid-19 sa nasod niadtong Miyerkules, Enero 19. Dugang sa DOH, unang higayon kini nga niubos ang daily tally og 30,000 ka bag-ong kaso sulod sa usa ka adlaw sa nangaging pipila na ka semana.
Sa Metro Manila, ang nag-unang nakatampo sa pagsaka sa kaso sa Covid, sa samang adlaw, dunay 8,376 ka bag-ong kaso nga natala. Sumala sa Octa research group, ubos na og 10,000 daily cases sud sa miaging duha ka semana. Base sa maong ihap, ang kaso sa kaulohan niubos sa 1.79 percent gikan sa 4.24 sa miaging semana o nagnegatibo sa unang higayon sa iyang weekly growth sukad sa Disyembre 24, 2021.
Apan si National Task Force (NTF) Against Covid-19 medical adviser Dr. Ted Herbosa nipasidaan nga di pa kini kasegurohan nga magpadayon kini nga kahimtang. Matod niya, ang Covid-19 cases trend susihon pinaagi sa one-week average daily attack rate ug growth rate.
Samtang, ang Octa nidugang nga nagkataas ang kaso sa daghang highly-urbanized cities gawas sa Metro Manila sama sa Bacolod, Dagupan, General Santos, Lapu-Lapu, Lucena, Naga ug Santiago nga ang Covid-19 ang pagtubo labaw na sa 100 percent gikan sa Enero 12 ngadto sa 18, 2022.
Ang mga dakbayan sa Baguio, Cagayan de Oro, Iloilo ug Zamboanga nitala og kapin sa 200 percent growth rate. Dugang sa Octa, ang Cebu City naa sa 378 percent ug Davao City naa sa 305 percent. Apan labing taas mao ang Tacloban City nga naa sa 469 percent. Ang DOH unang nipahayag nga ang Omicron variant maoy rason sa pagpaspas sa pagsaka sa kaso.
Numero lang kini sa ihap sa kaso sa Covid-19? Bisan gikataho nga dili ingon kaisog ang Omicron variant, apan misaka usab ang ihap sa namatay. Naghatag kini og bug-at nga pasidaan kanato. Dili mokompiyansa.