1K ka Covid sa Cebu City sa 1 ka adlaw

ANG Cebu City nakatala og 1,126 ka bag-ong aktibong mga kaso sa coronavirus disease 2019 (Covid-19) nga maoy labing daghan sa usa ka adlaw sa kasaysayan human niabot ang virus sa siyudad sa Marso 2020.

Base sa record sa Emergency Operations Center (EOC), 2,252 ka mga tawo ang gi-swab sa City Health Department(609), hospitals (1,171) ug ubang akreditadong mga laboratories (264) ug 50% kanila nagpositibo sa Covid-19 samtang 91 ang naka-recover sa virus infection.

Aduna say unom nga nakalas, pulos senior citizens, lima kanila walay bakuna batok sa Covid-19 samtang ang ikaunom ila pang susihon.

Tungod niini, 13 na ka mga kinabuhi ang nakalas sa unang 20 ka adlaw sa Enero sa 2022.

Matod ni City Councilor Joel Garganera, deputy chief implementer sa EOC, nga matag duha ka tawo nga i-swab, usa ang nagpositibo.

Si Garganera nagkanayon nga 60 porsyento sa nagpositibo nag-edad og 20 ngadto sa 40 anyos nga maoy sagad nagtrabaho.

Apan ilang nasuta subay sa ilang gipahigayon nga contact tracing nga wala kini nakuha sulod sa ilang gitrabahoan kon dili sa gawas.

Posible sa pagdungan og pangaon ug sa pagkukabildo samtang walay facemask.

77 KA BARANGAYS

Sa nakalabay nga 10 ka adlaw, ang Cebu City adunay 5,545 ka aktibong mga kaso nga nikuyanap sa 77 sa 80 ka barangay sa siyudad.

Nag-una ang barangay Guadalupe (532), Lahug (342), Apas (258), Tisa (247), Capitol Site (228), Camputhaw (215), Labangon (205), Talamban (196), Mabolo (185), ug Sambag 2 (161) nga maoy naglangkob sa top 10 barangays.

Ang ika-11 hangtod sa ika-77 nga barangay adunay 160 ngadto sa usa ka aktibong kaso.

Samtang ang barangay nga pabilin nga Covid-free mao ang Paril, Lusaran ug Buot nga pulos nahimutang sa bukiran sa siyudad.

Sukad niadtong Enero 15 hangtod Enero 20, ang Cebu City nag-average og 44.56% daily positivity rate nga maoy hinungdan sa kalit nga pagsulbong sa mga kaso sa Covid-19 diin niadtong Enero 1, ang siyudad aduna lay upat ka active cases gikan sab sa upat ka barangays.

Niining pagsaka sa mga kaso, gitug-an ni Garganera nga puno-puno na ang mga public hospital, apan normal pa ang occupancy rate sa pribadong mga hospital nga nahimutang sa Cebu City.

Nakatabang niini mao ang direktiba ni Mayor Michael Rama nga nagtugot sa home isolation sa mga individual nga asymptomatic ug mild symptoms.

Iyang gimandoan ang mga tambalanan nga dili dawaton ang mga pasyenteng dunay mild symptoms nga magpa-admit aron matagana ang ilang Covid beds sa pasyente nga critical o severe.

Bisan sa pagsulbong sa mga kaso, positibo si Garganera nga makaya ra kini sa mga Sugbuanon sama sa pakigbisog sa surge 1, 2 ug 3 inubanan sa pagsunod sa basic health protocol.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph