MGA personnel sa Cebu City Police Office gipaubos sa mass swab test sa Biyernes Enero 21, 2022 human kadaghanan kanila naka sinatig simtomas sa Covid 19.
Matod ni Police Lieutenant Colonel Wilbert Parilla, deputy city director for operations sa CCPO, nga duna nay daghang mga personnel nga nag positive.
Ang labing bag-o duha ka officials ang natakdan sa Covid, kinsa daling gipang isolate.
Tungod niini, nipagawas dayon og kamandoan si Police Colonel Ernesto Tagle, hepe sa kapulisan sa dakbayan sa Sugbo, nga ipa swab test ang tanan niyang personnel aron masayran kinsay positibo aron ipaubos sila sa isolation ug monitoron sa Regional Health Service 7.
“Yes ubay-ubay na sa atong kapulisan ang nag positive. Gani duna na sad tay mga officers nga nag positive. So ang directives karon sa atong city director nga ang tanang mga personnel nga naa karon sa atong headquarters shall undergo swab test,” matod ni Parilla.