Gipatay, gisud sako ug gilabay

DUGTA na ang lawas sa tapasero og tubo nga nakaplagan alas 3:25 sa hapon niadtong Huwebes, Enero 20, 2022, didto sa Matalam, Cotabato Province.

Giila ang biktima nga si Emilio Pacino, 62, laborer ug nagpuyo sa Barangay Kilada sa nahisgutang lungsod.

Sumala kang Matalam chief of police Major Junrel Amutannga, nakadawat sila og taho gikan sa mga sibilyan sa patay nga lawas sa tawo nga nakaplagan sa sapa didto sa utlanan sa mga barangay sa Ilian ug Kilada sa maong lungsod.

Daling miresponde ang mga pulis sa Matalam Municipal Police Station ug nakompirma ang patay nga lawas sa biktima nga gigapos ug gisulod og sako.

Sa paghiling sa patay nga lawas, nasayran nga duna kini dakong samad sa likod nga agi ginulgulan gamit ang kutsilyo ug samad agi sa bala sa pusil nga gituohang maoy hinungdan sa iyang kamatayon.

Mismo ang pamilya sa biktima maoy nag-ila sa patay nga lawas niini ug giingong tulo na diay kini ka adlaw nga wala na makauli sa ilang balay.

Padayon pang milusad og dugang imbestigasyon ang kapulisan sa Matalam MPS aron nga masulbad ang kaso.