WALA na gikasohan sa kapulisan sa Baliok ang drayber sa tanker truck nga nalambigit sa disgrasya nga gikamatay sa disc jockey (DJ) sa usa ka FM radio station sa Davao City nga si Orlando Maratas o mas nailhang si "Papa Benjo", Huwebes sa gabii, Enero 20, 2022, sa Dumoy, Toril, siyudad sa Davao.
Sumala ni Police Staff Sergeant Ramil Aredidon sa Baliok Police Station nga nagkaaregluhay na ang matag-partido ug nahukman sa pamilya sa biktima nga di na mopasaka og kaso ngadto sa korte.
"Ang both party naa diri sa atong istasyon, nagkaareglohay sila uban sa ilang abogado, ug mangayo na lang ta'g kopya nga nakanotaryo sa ilang nasabutan, andam na unta ang atong mga papers sa pagpasaka og kaso batok sa drayber sa tanker truck," ingon ni Police Staff Sergeant Aredidon nga nahinabi sa Superbalita Davao Biyernes pinaagi sa telepono.
Una niini, gikustodiya sa kapulisan sa Baliok police ang drayber nga si Marlou Mamac Bustamante human nalambigit sa disgrasya nga gikamatay sa DJ sa RGMA Davao nga si Papa Benjo.
Human sa disgrasya, nadeklara nga dead on the spot ang biktima sa mga miresponde nga Barangay Disaster Risk Reduction Management Council sa Dumoy, Talomo District, kinsa maoy unang miabot sa nahitaboan.