BALHOG sa prisohan ang salesman human nasikop sa kapulisan sa Ecoland Police Station atol sa buy-bust operation alas 4 sa hapon niadtong Huwebes, Enero 20, 2022, didto sa may Porras Village, Barangay Leon Garcia, Agdao District, Davao City.
Giila ang suspek nga si Jeffrey (bansagon gitago), 40-anyos ug nagpuyo sa Barangay Leon Garcia.
Sumala sa kapulisan, idlas ang suspek hinungdan nga dugay na nila kining gihupo-hupoan, hangtud nga malampuson na kining nasikop sa buy-bust.
Nakuha sa posisyon sa suspek ang 0.0695 gramo sa shabu nga dunay street value nga P1,500.
Depensa sa suspek, perte kunong paita sa panahon, hinay ang iyang pangita isip salesman butang nga misulod siya sa maong ilegal nga trabaho.
Kasong pagsupak sa Republic Act 9165 kun Comprehensive Dangerous Drugs Act of 2002 ang ipasaka batok sa suspek didto sa korte.