Vallena: Food delivery

Taudtaud nang dunay mga food delivery nga nagbiseklita instead nagmotorsiklo ang naghatod. Maanindot ni nga polisiya sa mga kompaniya nga nanawat og riders nga nagsakay og mountain bike.

Apan ako lang naobserbahan nga dunay mga rider nga kuwang sa kasayuran kalabot sa road safety, labina alang sa mga nagbiseklita. Kay kadaghan na ko nakasugat og bike riders nga naghatod og order nga ni counterflow. Kuyaw ning going against traffic bisan gabiseklita ka lang.

Niadtong Biyernes, naigking ko pagkasugat nako og duha ka mga bike rider sa usa ka food delivery nga nilatas sa karsada kilid sa Iglesia ni Kristo.

Nakasabot ko nga nagdali sila sa pag deliver, apan ang ilang gibuhat naghatag og risgo kanila ug sa ubang mga motorista. Bisan tuod di kusog kaayo ang dagan sa biseklita, the fact nga nisugat, naghatag kini og kakuyaw.

Usa sa nakakuyaw man gud sa counterflow mao ang mga blind corner nga daghan kaayo dinhi sa atoang dapit. Kuyaw kaayo nga moliko ka unya naa sab diay kay kasugat nga wa magtuo nga dunay moliko nga laing sakyanan. Nahitabo ni nako sa eskina sa Jakosalem ug R. R. Landon few times na.

Hangyo lang nako sa mga delivery service company, ipailawom og road safety seminar ang mga mountain bike rider nga inyong dawaton. Gikinahanglan kaayo kini nila aron sila makahibawo kon unsay buhaton sa dan aron malikayan ang mga aksidente.

MAKIT-AN

Sagad mag-uniform tuod ang food delivery personnel. Okay lang na, apan mas maayo nga ang riders sa inyong two-wheeled nga mga sakyanan, motorsiklo o biseklita, dunay parts nga reflectorized nga makita sa kagabhion, labina sa mga nagbiseklita.

Gawas nga kinahanglan ang tanang mag biseklita magsul-ob og helmet, kinahanglang butangan sab ang tanan og blinkers nga makita panahon sa kagabhion. Ang blinkers itaud sa likod sa helmet. Ang boxes mas maayo dunay imontar nga blinkers kay di makita kon anha sa seatpost kini ibutang.

Dako kaayo ni og ikatabang sa visibility sa riders panahon sa kagabhion nga maghimo kanilang luwas gikan sa ubang mga sakyanan, labina sa reckless nga mga driver, sagad mga nagmotorsiklo.

Ang visibility panahon sa kagabhion lahi kaayo sa adlawan. Gawas sa kakuwang sa kahayag, ang kahimtang sa utok lahi na kon gabii kay wired man tang tanan nga mopahuway sa kabaghion.

MOTOR GIHAPON

Ikatulong semana sa Enero, duna na say nangamatay tungod sa aksidente sa motorsiklo. Sa Dakbayan sa Naga, dunay asawa nga namatay kay ang ilang motorsiklo naigo sa laing motorsiklo nga posibleng kusog sab nga nakapadagan.

Tungod sa kakusog sa impact ang asawa nalabay ug naligsan sa usa ka sakyanan. Patay diha-diha ang babaye.

Niadto sang Huwebes sa gabii, hapit ko wa makakita sa kinaang nga mga masitas tunga sa karsada sa Brgy. Busay. Dakbayan sa Busay.

Gibutang diay kadto kay didto natumba ang babaye nga nadasmagan og motorsiklo sa paglabang. Di tingali maigo ang babaye kon ang nagpadagan hinay ra.

Kanus-a man kita makat-on sa pag-amping sa karsada?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph