MITAAS ang ihap sa mga aktibo nga mga kaso sa coronavirus disease 2019 (Covid-19) sa dakbayan sa Cagayan de Oro.
Anaa na sa 1,215 ang akitbo nga mga kaso ug 161 ang mga natala nga mga bag-ong kaso sa dakbayan, lima niini mga returning overseas Filipino (ROFs) ug 156 ang mga local transmissions.
Matud ni City Health Office medical officer Dr. Ted Yu, sa 156 ka mga local nga mga kaso, 101 ang mga local index nga kaso, 28 ang mga local cases with link, 18 ang mga Apors, ug siyam ang mga Apors with link.
Miabot sa 21,857 ang kinatibuk-ang ihap sa mga kaso sa Covid-19 sa dakbayan.
Ang Cagayan de Oro adunay 1,215 active cases, 281 niini na-admit sa Northern Mindanao Medical Center ug uban pang mga ospital sa syudad, 891 ang mga outpatient, ug 43 ang mga ROF/LSI.
Anaa na karon sa 19,780 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad naa sa 862.