Sa panahon nga mandatory pa ang Reserved Officers Training Corps (ROTC) aron makagradwar sa kolehiyo, daghang mga estudyante nga magpasakit-sakit aron di makaapil sa martsa-martsa nga magbuwad sa naglagiting nga init sa adlaw ug usahay mauwanan.

Dunay plano si Davao City Mayor Sara Duterte-Carpio nga kon modaog siya sa pagka bise presidente sa eleksyon karong Mayo, iyang iduso ang mandatory military service sa tanang mga Pilipino, babaye ug lalake, inig tungtong sa edad nga 18 anyos. Iyang gihimong ehemplo ang South Korea ug Israel.

Di lang kay training sa ROTC nga usa ra ka adlaw sa matag semana. Mag-alagad gyud sa Armed Forces of the Philippines (AFP). Si Duterte-Carpio adunay ranggo nga koronel isip usa ka reservist sa Philippine Army.

Ang ROTC gihimo na lang nga optional ubos sa Republic Act No. 9163, ang National Service Training Program (NSTP) Act of 2001. Sangpotanan kini sa awhag sa katawhan nga abolison ang mandatory military training human sa pagpatay ni Mark Wilson Chua, usa ka second year college cadet sa University of Santo Tomas tungod kay iyang gibutyag ang pangurakot sa military training program sa iyang eskuylahan.

Gisuportahan dayon si Duterte-Carpio sa AFP. Matod pa ni Col. Ramon Zagala, tigpamaba sa AFP, “We welcome the proposal as this is attuned to the times while the government is faced with adversities and challenges, aligned with our aspirations for the citizenry to contribute to nation-building.”

Nipaluyo usab sa maong plano ang Department of National Defense (DND). Matod ni Defense Secretary Delfin Lorenzana maghatag kini og “steady pool of reservists for defense and disaster relief operations.” Ang kabataan mahimo usab nga “better citizens” tungod sa ilang military training.

Apan matod ni Lorenzana dako ang latason sa maong plano, lakip na ang manpower ug pundo ingon man training camps alang sa minilyon ka mga 18-anyos nga mosulod sa maong programa matag tuig.

Nagkinahanglan ba ang Pilipinas og daghang mga sundawo ug mga reservists? Pareho ba ta sa Israel ug South Korea? Ang Israel kinahanglan nga mangandam sa kanunay kay gilibotan kini sa Arab nations nga nag-ila niini nga ilang kontra. Ang South Korea nag-atubang sa kanunay nga hulga sa North Korea nga armado og nuclear weapons.

Ang gikinahanglan sa Pilipinas mao ang dugang mga magtutudlo aron molambo ang atong edukasyon, dugang mga enhinyero nga mopabarog sa mga edipisyo ug moayo sa mga public infrastructure nga magsigeg kagusbat tungod sa mga bagyo, mga scientist, medical personnel ug mga doktor nga motambal sa mga Pilipino ilabi na sa panahon sa Covid-19 pandemic ug ubang mga trabahante nga makatabang sa pagpalambo sa atong ekonomiya.

Gawas pa, ang Pilipinas wa mangitag gubat ug way rason nga hagiton og gubat. Ang tipik sa Section 2, Article 2, 1987 Constitution, nagkanayon, “The Philippines renounces war as an instrument of national policy.”