4 ka most wanted, 2 ka NPA nasikop sulod sa 1 ka adlaw

Unom ka mga tawo nga pinangita sa balaod ang nangadakpan sa probinsiya sa Sugbo ug Negros Oriental sulod sa usa ka adlaw nga managlahing operasyon kagahapon, Enero 23.

Sa nangadakpan, tulo niini nag-atubang og kasong pagpanglugos ug usa ang attempted homicide samtang duha ang gikatahong mga sakop sa New People’s Army (NPA).

Si Police Lieutenant Colonel Epream Paguyod sa Regional Mobile Force Battalion (RMFB) 7 sa pakighinabi sa Superbalita Cebu, niingon nga malampuson nga nangadakpan ang duha ka mga sakop sa Terrorist Squad (CN1).

“Kining duha nga mga sakop sa NPA duna ni mga gipang-atubang nga warrant of arrest sa kasong murder,” matod ni Paguyod.

Unang nadakpan si Dieto Ferolino nga gihulagway sa kapulisan nga miyembro sa Terrorist Squad ug molupyo sa Barangay Banwague, dakbayan sa Guihulngan sa Negros Oriental.

Si Ferolino nag-atubang og warrant of arrest sa kasong murder nga giluwatan ni Judge Eric Anthony Dumpilo sa Regional Trial Court Branch 64 sa Guihulngan nga pinetsahan niadtong Nobiyembre 4, 2021.

Nasayran nga si Ferolino kanhi surrenderer sa 62nd IB niadtong 2020 ug giingong logistic officer sa grupo.

Ang dinakpan anaa karon natanggong sa Guihulngan Police Station.

Gikan sa pagkadakop kang Perolino sa alas singko sa kaadlawon sa Dominggo, nadakpan si Peligio Eustaquio, 53, ug lumad nga taga dakbayan sa Talisay.

Matod ni Paguyod, si Eustaquio nadakpan atol sa operasyon sa kapulisan sa Sitio Lutiran, Barangay Sta. Cruz, lungsod sa Liloan, Negros Oriental.

Si Eustaquio gidakop pinasikad sa warrant of arrest sa kasong murder nga giluwatan ni Judge Mario Trinidad sa Regional Trial Court Branch 64 sa dakbayan sa Guihulngan.

Sa impormasyon ni Paguyod, si Eustaquio nakapatay niadtong 2019 hangtud nga nagtagotago na kini.

Ang dinakpan kasamtangang gitanggong sa 703rd MC, RMFB-7.

“Actually dako ang epekto sa pagkadakop sa duha kay kon wala ni nangadakpan, posibleng mokisaw ning duha karong umaabot eleksyon,” dugang ni Paguyod.

Giingong mihuyang na ang maong grupo nga gikalambigitan sa duha apan magpabiling tunok gihapon kini sa kapulisan nga mohatag og kasamok sa katilingban.

Samtang sa Enero 22, ang RMFB-7 nakadakop og usa ka Christopher Chavez, kinsa gihulagway sa kapulisan nga nalakip sa Top 3 most wanted person sa Sugbo.

Si Chavez nagtagatago sa dakbayan sa Dumaguete sulod sa 12 ka tuig ug naposasan sa kasong lugos nga iyang nahimo niadtong Abril 2019.

Laing duha pa ka mga nadakpan nga dunay warrant of arrest sa kasong rape ug attempted homicide niadtong Enero 22 sa Siaton Police Station uban ang RMFB-7.

Usa ka Gery Jose, 51, ug usa ka mag-uuma, ang nadakpan sa kasong attempted homicide sa Barangay Hinakpan sa dakbayan sa Guihulngan.

Ang top 1 most wanted person nga nailhan nga si Dioscoro Macalipay, 59, gidakop sa kasong statutory rape sa Barangay 3 sa lungsod sa Siaton, Negros Oriental.

Sa katapusan mao si Jason Villahermosa, 22, ug taga Barangay Malo, lungsod sa Siaton apil nga nadakpan sa kasong rape.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph