Bisan sa kakuwang sa budget sa dakbayan sa Lapu-Lapu, ang tanang 88,453 ka mga pamilya nga nadaut ang ilang balay sa bagyong Odette makadawat og P5,000 nga financial aid.
Si Mayor Junard 'Ahong' Chan nipahibalo sa iyang Facebook page niadtong Sabado, Enero 22, nga dunay malumong kasingkasing nga nidonar og salapi sa pagsuporta sa P236 milyunes nga giluwatan sa kagamhanan sa dakbayan nga igo lang sa 47,000 ka indibiduwal.
Apan si Chan wala mobutyag sa mga tawo nga ningdonar og salapi sa dakbayan.
Ang siyudad nagkinahanglan nga makahipos og salapi nga P206 milyunes tungod sa financial assistance nga nagkinahanglan sa kinatibuk-ang kantidad nga P442 milyunes.
Matod ni Chan, ang kagamhanan nag-andam na sa gikinahanglan nga payroll alang sa pag-apud-apod sa salapi nga ihinabang.
“Dili ako mauwaw moduol sa mga saktong nga motabang kanato nga bahalag mura nakog makalilimos,” matod ni Chan.
Ang city council una nang nipasar sa ordinansa sa pag-release sa P302 milyunes nga gitagana sa financial assistance apan si Chan nagkanayon nga P236 milyunes lang ang naaprobar tungod sa legalidad ug conflicts sa local disbursing procedures.
Ang mga residente sa isla sa Olango mao ang unang nakadawat sa cash assistance niadtong Enero 16.
Apan si Bankal Barangay Captain ug Liga ng mga Barangay President Eduardo Cuizon nialegar nga dunay mga isyu ug concerns nga giisa ang mga residente sa pag-apud-apod sa financial aid.
Si Cuizon niasoy sa SunStar Cebu kagahapon, Enero 23, nga dunay nakadawat og hinabang bisan ang ilang balay wala madaut sa bagyo.
Samtang, si Cuizon nakadawat usab og taho nga dunay kabalayan nga nadaut apan ang mga tag-iya niini wala makadawat og hinabang.
Apan napakyas ang kapitan sa paghingalan sa partikular nga kaso sa reklamo.