WALAY executive order nga gipagawas si Cotabato Governor Nancy Catamco sa pagpatuman sa "No vaccination card, no entry" sa mga checkpoint sa probinsiya.
Gani gikakurat sa gobernadora ang kalit nga pagpatuman niini sa Philippine National Police.
Matud ni Catamco nga ang gipatuman karon sa Inter-Agency Task Force (IATF) on Covid-19 sa probinsya base sa mga bag-o nga mando nga giisyu sa national IATF human gilakip sa Alert Level 3 ang probinsiya.
Tungod sa padayong pagsaka sa ihap sa mga nataptan sa kagaw, giapil ang Cotabato sa level 3 sa IATF national.
Apan walay labot sa mando ang gipatuman karon sa kapulisan sa ilang mga checkpoints nga "no vaccination card, no entry."
Ang lungsod sa Pikit maoy naapektuhan niini human nga taas kaayo ang linya sa mga sakyanan sa mga checkpoint.
Giklaro ni Catamco nga tungod nalakip sa Alert Level 3 ang probinsiya, adunay mga establisemento ang sirad-an samtang hugot nilang gipatuman ang 30 percent nga indoor ug 50 percent nga outdoor capacity, kanunay nga magsul-ob og face mask, social distancing ug kanunay nga paghugas sa kamot.