SA PAG-TRENDING ni presidential aspirant Ferdinand “Bongbong” Marcos Jr. sa social media sa wala paghilakip niini sa The Jessica Soho Presidential Interviews niadtong Enero 22, 2022, nasubo ang mga supporters niini sa Davao City gumikan alang nila, sayang ang maong kahigayonan.
Sumala sa vendor nga si Helen Lascuña, 44, taga Barangay Ubalde, Davao City, nga sayang ang maong higayon gumikan alang niya kini ang higayon nga mahitsas ang desisyon sa katawhan kon kinsa ang angay nga iboto.
"Sayang oy, nindot unta gyod to kay para makabalo ang tawo kinsay maayong lider diha sa posisyon sa pagka-presidente. Bisan moingon sila nga bias, dili man bias, pantay man ang pangutana ni Ms. Jessica sa mga isyu," ingon ni Helen.
Ang die-hard fan ni BBM nga siya Sita Roa, 40, taga Buhangin Davao City, nagbutyag nga, "Bisan og wala si BBM sa interview mao gihapon na'y modaug oi, diha man gyod ang tawo kay proven and tested na ang mga Marcos sa serbisyo. Di na sab mahitabo ang martial law sa panahon sa social media, imposible na kaayo."
Gihugunhugonan karon ang vice-presidential interviews diin daghan ang naghulat kang Davao City Mayor Sara Duterte.
"Mayor Inday na gud na, atangan gyod nato, solid kaayo si Mayor Inday, go... go, Mayor Sara," ingon sa suporter ni Mayor Inday nga si Jacky Fuente, taga Brgy. Tomas Monteverde Sr, Agdao Davao City.
Apan sa kabahin ni vice-presidential aspirant Vicente "Tito" Sotto III, andam siya niini, ug gilakbitan ni Sotto nga dako iyang pasalamat nga sa ulahing State of the Nation Address (Sona) ni Pangulong Rodrigo Duterte sa miaging tuig napaila-ila siya sa pangulo nga siya usa ka maayo kaayong lider ug angay sa maong posisyon.
Sa hamubo nga virtual press conference ni Sotto niadtong Sabado kauban ang mga miyembro sa media sa Davao City, giingon ni Sotto nga di na sab layo iyang kasingkasing sa Davao Region gumikan sa mga natukod nga siyudad ngari diin usa siya sa mga hinungdan niini.
"Malaki ang aking pasasasalamat kay Pangulong Rodrigo Duterte sa pagtitiwala sa akin ng buong-puso," tipik sa pahayag ni Sotto.
Dugang sa vice-presidential aspirant nga kon siya ang mahimong ikaduhang pangulo sa nasud, iyang pangunahan ang Dangerous Drugs Board, ang Department of Interior and Local Government (DILG) ug Philippine Drug Enforcement Agency (PDEA) aron mas mapalambo pa ang operasyon niini nga sarang makatandog sa kinabuhi diha sa pobre.
"If you ask me about the agencies I want to lead if I win, I would say Dangerous Drugs Board, PDEA at tsaka DILG. I will have complete control of enforcement and rehabilitation programs," tipik sa pamahayag ni Sotto.
Sa pagka-bise presidente, si Mayor Sara ug Sotto ang nagsunod sa survey, butang nga mas kinahanglang anaa sila kon ugaling dunay vice-presidential interviews si Soho aron nga mas matin-awan pa ang katawhang Filipino.