DAKO ang kalipay sa mga lumad sa duha ka mga hilit nga barangay sa Kiblawan, Davao del Sur human sila nadalitan og mga bugas ug delata sa kapulisan nga naglangkob sa Revitalized-Police Sa Barangay (R-PSB).
Nagpasalamat ang mga lumad sa Barangay Abnate ug Barangay Tacul sa kapulisan sa R-PSB sa dapit nga gipangunahan sa mismong team leader nga si Police Executive Master Sergeant Michael Allera sa Barangay Tacul ug si Police Master Sergeant Fernando Batal sa Brgy. Abnate nga ubos sa pagdumala ni Police Lieutenant Colonel Werenfredo Regidor Jr., force commander sa 2nd Davao Sur Provincial Mobile Force Company.
Usa kini ka programa sa kapulisan ngadto sa komunidad agig pagpabati sa tiunay nga serbisyo sa gobyerno alang ngadto sa mga anaa sa hilit nga dapit.
Gimugna sab kini aron mapadayon ang pagpatunhay sa kahapsay ug kalinaw diha sa komunidad.