USA ka 11 ka bulan nga batang lalaki nga nagpositibo sa coronavirus disease 2019 (Covid-19) mao ang pinakaulahing namatay sa lungsod sa Compostela, Davao de Oro.

Kini ang gikompirma pinaagi sa opisyal nga Facebook page sa lokal nga panggamhanan sa Compostela.

Subay sa maong post, nagbutyag nga ang pasyente mao ang ika-51 nga namatay ug mao ang ika-1,063 nga kumpirmadong kaso sa Covid-19 sa lungsod.

Gibutyag nga ang bata taga Barangay Poblacion, kinsa giingong na-admit sa Davao De Oro Provincial Hospital-Montevista.

Ang bata na-swab test niadtong Enero 14, ug migawas ang resulta niadtong Enero 15 nga positibo siya sa virus. Apan pagka-Enero 20, Huwebes, namatay siya.

Ning kasamtangan, ang lungsod aduna nay siyam ka aktibong kaso sa Covid-19, hinungdan nga kanunay nga nagpahimangno ang lokal nga panggamhanan nga kanunayng sundon ang mga nag-unang health protocols nga gipatuman sa gobyerno ug kanunay nga "mag-ampo sa Labaw'ng Makagagahum" aron nga malikay ning gikalisangang sakit.