Gipakita sa NBA league-leading Phoenix Suns nga aduna silay daghang bawon nga bala isip hulip kon dimalason ang ilang mga pambato nga players.
Ang mga backup players maoy nagpadilaab sa opensa sa Phoenix aron ihagsa ang Indiana Pacers, 113-103, sa NBA regular season game kagahapon didto sa Phoenix, Arizona.
Si Devin Booker, ang top scorer sa Phoenix, nalimitahan ngadto sa 11 puntos sa 5-of-23 shooting ug botlog kini sa iyang unom ka itsa sa three-point range.
Hinuon ang bati nga duwa ni Booker natapakan sa iyang teammates nga si Mikal Bridges ug Bismack Biyombo.
Mimugna og season high 23 puntos si Bridges samtang ang bigman nga si Biyombo mitali’g career best 21 puntos aron ituboy ang Suns ngadto sa unom ka sunodsunod nga daog.
Epektibo pud ang gipakita ni Biyombo sa depensa diin milabni kini’g 13 ka rebounds.
Ang 6-foot-8 nga si Biyombo dako nga surprisa alang sa Phoenix. Una kining mipirma og 10-day contract alang sa team niadtong Enero 1. Tungod sa iyang maayong gipakita gihatagan kinig kontrata sa Phoenix para sa tibuok season.
Ang point guard sa Phoenix nga si Chris Paul maayo pud ang giduwa ug mikulit kini’g 18 puntos ubanan sa 16 ka assists.
Matod pa ni Bridges nga ang nakanindot sa ilang team ang tanan adunay duwa. Dugang pa niini nga mahatagan gyud og tsansa ang players kay tungod sa ilang unselfish mantra.
Ang Phoenix maoy naghupot karon sa NBA best record nga 36 ka daog batok siyam ka pilde.
Giangkon ni Indiana head coach Rick Carlisle nga gidimalas tuod si Booker apan gipatay pud sila ni Bridges sa opensa niini.
“Bridges really killed us tonight,” batbat ni Carlisle. “With the way he does things off the ball, he finds the nook and crannies, he gets open for 3s in the corners. He was tremendous.”
Kuwang sa tawo ang Pacers sa maong duwa. Unom sa ilang players anaa sa inactive list, lakip na niini ang top three scorers nga si Domantas Sabonis (ankle), Malcolm Brogdon (sore right Achilles) ug Caris LeVert (sore right calf).