Magnifico! Nasakmit ni Mark Magsayo ang World Boxing Council (WBC) featherweight title

Natuman ang pangandoy ni Mark Magsayo nga mahimong world champion human niya mailog ang World Boxing Council (WBC) featherweight belt ni Gary Russell Jr. didto sa Atlantic City, New Jersey kagahapon.

Midaog ang 26-anyos pinaagi sa majority decision. Ang usa ka judge mihatag og tabla nga iskor, 114-114, samtang ang laing duha mipabor kang Magsayo nga adunay 115-113 nga scorecards.

Nahimong emosyonal ang lumad nga taga Tagbilaran City, Bohol human madungog ang desisyon. Giisa niya ang iyang duha ka mga kamot sa kalipay.

“This is my dream, my dream come true,” batbat ni Magsayo. “This is my dream since I was a kid, since I was an amateur.”

Mikulit og kasaysayan si Magsayo (24-0, 16 KOs) og nahimong ikaduhang Filipino boxer nga midaog sa WBC featherweight title sunod ni two-time world champion Luisito Espinosa nga mi-kampiyon sa tuig 1995.

Si Manny Pacquiao nahimong lineal featherweight champ niadtong 2003 human niya gilupig si Marco Antonio Barrera.

Gitapos pud ni Magsayo ang unom ka tuig nga paghari sa Amerikanong boksidor nga si Russell sa featherweight. Nahagsa ang rekord niini ngadto sa 31-2, 18 KOs.

Napiang ang right shoulder ni Russell sa fourth round og mipadayon kini sa away nga gamit ang iyang usa ka kamot. Si Russell usa ka southpaw o walhon.

“That was a bit of an advantage to me because he’s using only one hand,” matod ni Magsayo.

Basi sa CompuBox stats, si Magsayo adunay 41 percent landed power shots (140 of 340) samtang si Russell anaa lang sa 22 percent (58 of 259).