NAGSUGOD ang "election period" niadtong Enero 9. Mahuman kini hangtud sa Hunyo 8 diin anaa nay mga bag-ong napiling lider sa atong nasud.

Adunay unom ka mga seryusong kandidato pagka-presidente ug usa kanila maoy mangulo sa nasud sulod sa unom ka tuig. Matud pa sa mga batikan sa politika, kulang ra ang unom ka tuig sa maayong presidente samtang sobra ra ang unom ka tuig sa mangtas ug pulpol nga pangulo.

Niadtong niaging semana, gipahigayon ang "one-on-one interview" sa TV sa mga kandidato. Nisipot ang lima diin ilang gipadayag ang ilang tinguha pagka-presidente ug baruganan sa mga isyu sa katilingban. Ang maong klase sa pasundayag nagpakita lamang nga medyo lahi na ang pamaagi sa kampanya karong tuiga tungod sa hadla sa Covid-19.

Busa mintras anaa pa ang Delta ug Omicron variants sa Covid-19 mag-anad na ta sa ingon niini nga klase sa pagkabig og boto.

Ang mga politikanhong partido nagtukod karon og "social-media team" nga maoy agian ug mobandilyo sa mga impormasyon kabahin sa ilang mga kandidato.

Ang uban kay nipalit og estasyon sa radyo, cable-TV ug online channel alang sa ilang kandidato.

Medyo nihinay ang pamantalaan mao ang mas kusog karon ang paggamit sa radyo, TV ug online sa propaganda. Base sa resulta sa pinakabag-ong surbey, nag-una gihapon ang Bongbong Marcos (BBM)-Sara tandem.

Daghan ang nagtuo nga nadala si BBM sa papularidad ni Mayor Sara nga gikahugonan nga maoy mopuli sa iyang amahan. Daghan sab nga nagtuo nga nisikat si BBM tungod sa iyang kakayahan nga mamuno ug tungod sa iyang pamilya, samtang may grupo sab nga nibabag sa iyang pagdagan.

"Never a Marcos again!" matud pa nila tungod sa kabangis nga ilang natagamtaman sa panahon sa Martial Law nga gimando sa iyang amahan nga si Presidente Ferdinand E. Marcos.

Tinuod nga mga isyu kini nga atubangon ni BBM apan ang dakong pangutana kung kahibalo ba gayud kita sa lintunganay sa maong isyu.

Tinuod ba ang tanang impormasyon nga atong nahibaloan kabahin ni Apo Ferdie, sa iyang administrasyon, sa Martial Law, kang Imelda nga iyang asawa ug sa binilyon nga bahandi nga anaa sa ilang pangalan?

Sa batan-on pa kita, kanunay natong madunggan nga dautan ang mga Marcos ug wala kini nahimo nga kaayuhan sa nasud kung dili ang pagpadako lamang sa ilang bulsa ug pagpadaghan sa sapatos sa First Lady.

Tinuod kaha ang hunghungihong nga kining tanan nga hulagway sa ilang kinabuhi ug pagdumala ginama lamang sa langyaw'ng nasud sama sa Amerika gamit ang Central Intelligence Agency (Cia), KGB sa Russia, SIS o MI6 sa United Kingdom, Yakuza sa Japan, Mossad ug Shabak sa Israel, Mafia sa Italy nga gustong mo-kontrola sa kalibutan ug sa Pilipinas?

Dili malilong nga nahimo kitang itoy sa US sa dugay na nga panahon busa nituo ako nga daghan silang gihimo sa nasud nga wa nato matugkad ug alang lamang sa ilang interes.

Busa may mga grupo sa batan-on karon nga buot masayod sa kamatuoran ug isakto ang kasaysayan ug isabwag kini alang sa atong kasayuran.