COTABATO CITY -- Dumot sa pamilya ang gilantaw sa mga awtoridad nga hinungdan sa pagpamusil sa magparyente didto sa Sultan Kudarat, Maguindanao Province niadtong Dominggo sa alas 11:45 sa udto, Enero 23.

Sa maong insidente, usa ang namatay nga giilang si Nasrudin Guialudi, 21, ulitawo ug nagpuyo sa Barangay Dalumangcob, sa nahisgutang lungsod.

Usa sab ang nasamdan nga giilang si Saida Piang, 26, dalaga ug molupyo sa Barangay Buloc, Sultan Mastura, sa maong probinsiya.

Sumala kang Maguindanao Provincial Police Office Director Colonel Jibin Bongcayao nga sakay ang mga biktima sa payong-payong nga motorsiklo ug pagawas na unta sa Camp Darapanan sa Moro Islamic Liberation Front (MILF) gikan sa gitambongan nilang husa sa Shariah court aron mopauli na sa ilang mga gipuy-an, apan pag-abot sa magparyente sa Barangay Crossing Simuay sa lungsod sa Sultan Kudarat, kalit gipamusil sa duha ka wala mailhing lalaki nga misulpot lang og kalit sa daplin nga bahin sa dalan ug kinsa dali sa dayong mieskapo paingon sa hilit nga dapit sa lungsod sakay og motorsiklo.

Mga biktima daling gisapupo sa mga mirespondeng pulis ug gihatud ngadto sa Cotabato Regional and Medical Center sa Cotabato City apan gideklara sa doktor si Guialudi nga dead on arrival human makaangkon og tulo ka mga samad sa lawas.

Samtang si Piang naluwas kinsa nakaangkon lang og samad sa tuo niyang kamot.

Nasayran nga sa wala pa ang pagpamusil, gikan ang mga biktima sa Shariah court sa Camp Darapanan ug wala magkahusay sa ilang kaaway nga misampot pa sa grabeng panaglalis.

Naa nay mga persons of interest nga giimbestigsahan ang mga pulis sa Sultan Kudarat Municipal Police Station aron nga mahatagan og hustisya ang gidangatan sa mga biktima. Edgar E. Fuerzas)