DAVAO ORIENTAL -- Personal nga gisusi sa bag-ong secretary sa
Mindanao Development Authority (Minda) Secretary Maria Belen Acosta ang lugar sa Pintatagan ug Maputi rivers sa Banaybanay, Davao Oriental nga apektado sa water discoloration.
Gilayong miaksiyon si Acosta pinaagi sa paghatag og ayuda sa mga residente nga apektado human nasuta sa kanhi konsehal sa Davao nga si Acosta ang kahimtang sa mga residente ug ang sitwasiyon sa mga sapa sa dapit.
Giseguro ni Acosta nga sa hinanaling panahon mahatagan og paspas nga solusyon sa problema ug maapod gilayon ang ayuda ngadto sa mga residente.
Samtang kinasingkasing sab nga mipaabot sa iyang suporta si kanhi Department of Agriculture (DA) Secretary ug former Minda chairperson Emmanuel Piñol.
All-out support suma pa si Piñol sa newly-appointed chair nga si Acosta.
"It was a very cordial engagement and meeting of minds where I shared with her what had been started under my two-year stint as Minda chairman," ingon ni Piñol.
Dugang ni Piñol nga sa umaabot nga mga adlaw gilaraw niini ang pakigtambayayungay alang sa paspas ug dugang kalamboan sa Mindanao.
Si Piñol na-appoint isip Minda chair niadtong Agosto 5, 2019, apan iyang gibakante ang puwesto niadtong Oktubre 5, 2021 aron kahatagan og higayon ang iyang pagdagan isip senador niadtong 2022 elections.
Si Acosta gitudlo ni Presidente Rodrigo Duterte ug nanumpa niadtong Enero 13, 2022 diin si Acosta maoy nagsilbing ikawalo nga Minda chairperson ug ikaduhang Mindanaoan nga babayeng lider sa maong ahensiya diin ang una mao si Luwalhati Antonino gikan 2010 ngadto sa 2016.
Si Acosta mao usab ang motindog isip Philippine Signing Minister diha sa pagsalmot sa Mindanao ug Palawan sa country's Eaga focus areas diha sa BIMP-Eaga sub-regional cooperation, diha sa mandato sa Minda nga Philippine Coordinating Office alang sa BIMP-Eaga (PCOBE) ubos sa Republic Act 9996. (Jeepy P. Compio/PNA)