MAS gipaluag karon ang rekisitos sa pagkuha og health card sa Davao City gumikan sugod kagahapong adlawa, Enero 24, giwagtang na ang Reverse Transcription Polymerase Chain Reaction (RT-PCR) o ang antigen test negative results isip nag-unang requirement.

Atol sa Special Hour sa 87.5 FM Davao City Disaster Radio dcDR kagahapon, Lunes, Enero 24, giingon ni Davao City Mayor Sara Duterte nga dili kini himuong requirement.

"Dili himuong requirement ang RT-PCR test or antigen test sa pagkuha og health card sa Davao City... gitanggal na kini as requirement," tipik sa gisulti ni Duterte-Carpio.

Kini suma pa ang nahukman sa mga naglangkob sa lokal nga Inter-Agency Task Force sa ilang meeting kagahapon.

Giingong ang matag ahensiya na lang ang mohatag og giya ngadto sa mga mokuha og health cards kung unsay mga angay nga himuon aron maseguro nga luwas sa Covid-19 ang matag aplikante.

Hinuon, gipaburan sab kini sa mga aplikante aron paspas na unya ang ilang pagproseso sa ilang mga papeles alang sa ilang pangempleyo ug sa bisan usang katuyoan diin asa gamiton ang health card.

Kahinumdoman nga sa miaging tuig, gipaimposar alang sa tanang magkuha og health cards ang RT-PCR test negative results aron maseguro nga wala nataptan sa virus ang matag aplikante.