Gianunsyo ni Filipino pole vault Olympian EJ Obiena kagahapon, Enero 24, 2022, nga opisyal na siyang miatras sa gitanyag sa Philippine Sports Commission (PSC) nga mao kini ang modumala sa paghusay sa bikil ni Obiena ug sa mismong national sports association (NSA) niini.
Matod ni Obiena nga nakadesisyon siya niini tungod sa dili maayong pagtuo sa Philippine Athletics Track and Field Association (PATAFA) ug sa presidente niini nga si Philip Ella Juico ngadto kaniya.
Taodtaod na sab nga nagkabikil ang duha ka mga kampo human gipasanginlan sa PATAFA si Obiena nga wala kini niini nagamit sa insakto ang pinansyal nga pundo nga gitagana alang sa iyang training.
Ang PSC mitanyag nga magpatunga aron mahusay ang kakulian ug nangayo kini’g suporta sa Philippine Dispute Resolution Center, Inc. alang ning maong lakang.
Apan gipasabot ni Obiena nga dili siya makasanong sa proseso sa PSC gumikan sa pagtrato sa PATAFA ngadto kaniya.
“I thank PSC chairman Butch Ramirez for his hard work as a peacemaker. I believe in mediation as a tool for peace and have full trust and confidence in the integrity of chairman Butch Ramirez,” pamahayag ni Obiena nga napatik sa www.abs-cbnnews.com.
“Unfortunately, it seems that PATAFA is only using mediation as means to silence me and to keep the truth hidden. They always trumpet that I should go to mediation if I have nothing to hide. I have nothing to hide and that is the reason why I do not want to go to confidential mediation.”
Gipasabot ni Obiena nga gusto niyang mapakatap sa publiko kon mogawas na ang ang kamatuoran.
“It is with great regret that I am forced to officially withdraw from the PSC offer of mediation due to the bad faith of Mr. Juico and PATAFA,” dugang ni Obiena.
Gipabuhagay ni Obiena nga gimaniubra sa PATAFA ang kamatuoran aron matago kini sa publiko.
Gibutyag sa numero unong pole vaulter sa Pilipinas nga hingpit na siyang nawad-an og pagsalig ngadto kang Juico.
Hinuon giklaro ni Obiena nga bisan ning tanan niyang kaagi, dili siya motalikod sa kaugalingon niyang nasod ug kutob sa iyang mahimo, morepresentar siya sa Pilipinas sa nagkadaiyang dagkong kompetisyon sa kalibutan.