Gipabuhagay sa bag-ong World Boxing Council (WBC) featherweight champion nga si Filipino Mark Magsayo nga andam siyang makig-away bisan kinsa.
Mao kini ang nagsilbeng reaksyon ni Magsayo kabahin sa gihandom nga rematch ni American Gary Russell Jr., kinsa maoy iyang giilugan og world title pinaagi sa majority decision niadtong Dominggo, Enero 23, 2022 (RP time) sa Borgata Hotel Casino & Spa sa Atlantic City.
Gipabuhagay ni Russell ang iyang pagtuo nga siya ang angayang midaog sa away hinungdan nga nagtinguha siyang makigsangka og balik sa lumad nga Boholano.
Ang nakaapan lang kay wala’y rematch clause si Russell sa iyang kontrata sa iyang pagpakigbatok kang Magsayo.
Hinuon, giklaro ni Magsayo nga wala siya’y atrasan bisan kinsa nga kontra apan nag-agad ra siya sa desisyon sa iyang promotional outfit nga mao ang MP Promotions, nga gipanag-iya ni Filipino boxing legend Manny Pacquiao.
“It’s up to my promotional team,” matod ni Magsayo nga napatik sa www.boxingscene.com.
“But I’m willing to fight anybody. I’m the champion now!”
Giangkon ni Magsayo nga nakapabor siya sa away human naangol ang tuo nga abaga ni Russell apan wala kini niya panumbalinga ug ang mahinungdanon alang kaniya, natuman na ang iyang dugay nga pangandoy.
“I knew that he was hurt in round four,” asoy ni Magsayo, kinsa adunay 24-0, 16KOs nga rekord.
“I took advantage of it because he was only using one hand. This was my opportunity to follow through. My coach was telling me to use good combinations and follow through. He said this is your chance to become a champion and now I am a champion.”