Makabungol na ang bagulbol sa katawhan nga hangtod ning higayona wa pa gihapon mahibalik ang ilang suga ug internet connection human gikusokuso ta ni Bagyong Odette kay buot silang mahibalik na ilang matag adlaw nga gimbuhaton.
Nadelatar ang pagbalik sa suga ug internet connection resulta sa giingong pagpangilkil sa mga lineman kinsa modawat og salapi bugti nga ang usa ka lugar matrabaho gilayon ang ilang linya bisan kon dunay nag-una nga mao untay prayoridad nga ilang trabahuon.
Sa atong panukiduki, adunay na-post sa social media nga nangangkon ang mga konsumidor nga nag-amot og salapi aron ihatag sa mga lineman bugti nga ang ilang dapit maoy unahon sa pagpasiga. Sa internet, dunay mga nagtug-an nga giingnan silang mag-andam og P5,000 kon gusto mabalik dayon ilang internet connection.
Dunay uban nga nakahatag sa samang kantidad apan kadali ra ang ilang internet nagamit kay ang gikuhaan sa linya niini kadto mga konsumidor nga wa pa makabayad sa telecommunications company (telco) apan dihang nakabayad gibawi ang linya. Ang uban didto mikuha sa linya nga buhi na unya pwerteng taasa sa wire ang gigamit mahibalik lang bugti sa lingin nga kasabutan ug kwadradong hinungdan.
Niini, ang National Bureau of Investigation (NBI) nagsugod na sa ilang imbestigasyon kon si kinsa ang mga nagpaluyo niini. Ang Visayan Electric maoy nihangyo sa NBI dihang gimandoan sila sa Energy Regulation Commission (ERC) nga susihon ang giingong pangilkil nga naglambigit sa ilang mga lineman.
Dili kini binuhatan sa mga organic nga empleyado sa Visayan Electric kon dili sa ilang mga kontraktor nga maoy ilang gitahasan nga maoy motrabaho sa ilang obligasyon. Sama usab sa telco nga ang mga organic nilang personnel wala naghimo niini kay gisalig nila tanan sa ilang mga kontraktor ang pagmontar sa kable sa poste ngadto sa koneksyon sa tagsa-tagsa ka balay.
Kon mapamatud-an ning pangilkil sa mga lineman, angayan tingali nga ang Visayan Electric ug mga telco motangtang ini nila ug di na sila makigkontrata sa ilang mga kompaniya. Pasakahan og kaso aron di na kini mausab sa mga mosunod nga panahon nga makasinati kitag laing katalagman ingon niini usab ang madangatan. (josephelvirtubilan@gmail.com)