Nasikop sa kapulisan ang 20 ka mga sugarol sa pagronda sa duha ka mga tigbakayan sa lungsod sa Minglanilla, lalawigan sa Sugbo niadtong Dominggo, Enero 23.

Sa Sitio Lower, Barangay Linao, unom ka mga sugarol ang nasikop human napiit sa ginukdanay tali sa kapulisan, alas 3:20 sa hapon.

Nasakmit gikan sa unom ang duha ka mga manok igtatari ug P359 nga pusta.

Gisundan sa laing pagpangronda sa Purok 9, Barangay Cadulawan, alas 4:30 sa hapon sa samang adlaw, diin 14 ka mga sugarol ang nasikop.

Nakompiskar ang duha ka manok igtatari, duha ka buwang, ug P 540 nga pusta.

Si Major William Homoc, hepe sa Minglanilla Police Station nga nahinabi sa Superbalita Cebu, nagkanayon nga ubay-ubay sa mga sugarol ang nagkatibuwaag sa pagpanagan dihang nakabantay nga naabot ang kapulisan.

Ug sa gihapon, si Homoc nagpasalamat sa gihatag nga mga impormasyon sa katawhan nga niresulta sa pagkasikop sa mga sugarol sa manok.