ORMOC CITY - Nasikop sa sa kapulisan ang usa ka lalake atol sa gipahigayon nga Comelec checkpoint sa Barangay Cogon ning dakbayan, alas 7:25 sa buntag, Huwebes, Enero 20, 2022.
Giila sa kapulisan ang suspek nga si Raul Ollave, 46, way trabaho, taga Purok 7, Barangay Can-adieng, Ormoc City.
Matod sa report sa kapulisan, niagi sa Comelec checkpoint ang suspek sakay sa motorsiklo.
Sama sa ubang motorista nga nakaagi sa checkpoint, gipangitaan sa kapulisan og lisensya ug rehistro ang suspek.
Miabli kini sa iyang u-box, pagkuha sa rehistro sa iyang bag, nakit-an sa pulis ang pul-an sa pistola nga misiwil sa bag.
Tungod niini, gihangyo sa pulis ang suspek nga ipagawas ang sud sa bag.
Nakompiska gikan ni Ollave ang usa ka kalibre .45 nga pistola nga dunay magazine ug dunay pito ka mga buhing bala; duna usay laing duha ka magazine nga dunay 14 ka buhing bala.
Walay napakita nga papeles ang suspek sama sa Certificate of Authority sa pagpanag-iya ug pagdala sa armas.
Gidala sa Police Station 1 si Ollave ug gipasakaan og kasong kalapasan sa Republic Act 10591 o illegal possession of firearms ug Omnibus Election Code (gun ban).
Si Ollave maoy labing unang nasikop sa kapulisan sa Ormoc gikan sa pagpatuman sa gun ban.