Gisugdan na sa Kagamhanan sa Probinsya sa Sugbo ang pagpang-apud-apod sa cash incentives nga unang gisaad ni Cebu Governor Gwendolyn ‘Gwen’ Garcia sa kapulisan, sundawo ug mga linemen nga niabag ug nitabang sa padayong pagbangon pag-usab sa lalawigan sa Sugbo.

Ang Kapitolyo nigahin og P17,065,000 isip financial incentives alang sa moabot 3, 413 ka mga personnel nga nitabang sa clearing operation sa kalungsoran sa probinsya.

Moabot sa 580 ka mga linemen gikan sa upat ka power distributors nga Cebu Electric Cooperative (Cebeco) I, II, and III, ug ang Visayan Electric Company (Veco) ang kwalipikado nga modawat sa P5,000 nga cash incentive.

Nalakip usab niini ang 200 ka mga sundalo nga ningtabang sa clearing operations sa lalawigan.

Ang eligible nga mga benepisyaryo gikinahanglan lang nga mopresentar sa ilang company ID aron makubra ang incentives sa Provincial Treasurer’s Office sa Kapitolyo.

Ang probinsya sa Sugbo, partikular na sa habagatang Sugbo nga gikusokuso pag-ayo sa bagyong Odette niadtong Disyembre 16, 2021 diin moabot sa 90,000 ka mga panimalay ang apektado sa 36 ka mga lokalidad.