Nasakmit sa Bureau of Customs (BOC) ang P150 milyones nga balor sa peke nga Covid-19 antigen test kits, LianHua Chinese nga mga tambal ug peke nga mga maskara sa usa ka bodega sa Manila, kini ilang gipahibawo sa Lunes, Enero 24, 2022.
Sa usa ka pamahayag, ang BOC nagkanayon nga ang mga butang nasakmit sa usa ka bodega sa 555 Carlos Palanca, San Miguel, Manila City niadtong Biyernes, Enero 21, ug ang operasyon niini misangpot usab sa pagkasikop sa tag-iya sa bodega nga usa ka Chinese national.
Ang bodega adunay sulod nga P150 milyones nga kantidad sa Clungene Covid-19 antigen test kits, peke nga LianHua Chinese herbal medicines, ug peke nga 3M N95 face masks, matod sa bureau.
Dugang pa, gitipigan niini ang mga butang nga nakalapas sa intellectual property lakip ang mga sinina gikan sa mga tatak sama sa Nike, Fila, Converse, Adidas, ingon man mga Louis Vuitton ug Gucci nga mga bag, pitaka ug mga gamit sa telepono.
Ang pagsakmit nahitabo samtang ang Pilipinas nag-atubang sa ikaupat nga surge sa coronavirus disease 2019 (Covid-19) pandemic nga dala sa Omicron variant sa Sars-CoV-2.
Ang mga residente nanglimbasog sa pagkuha sa antigen test kits ug mga tambal alang sa ilang kaugalingon samtang ang Department of Health nagtaho sa talagsaong gidaghanon sa bag-ong mga kaso kada adlaw ning bulana.
Gitugot usab sa DOH ang pag-isolate sa balay ug pagtambal alang sa mga mild nga kaso aron mapugngan ang pagdagsang sa mga pasyante sa mga ospital sa nasud.
Mag-atubang og kaso ang tag-iya sa bodega tungod sa paglapas sa Customs Modernization and Tariff Act partikular na sa Sec. 1401 (Unlawful Importation/Exportation) ug Section 1113 (Property Subject to Seizure and Forfeiture) in relation to Sec. 118 (Prohibited Importation and Exportation), ug mga lagda ug regulasyon sa Food and Drug Administration.