Kapulisan sa Siyudad sa Sugbo nakasikop og dul-an 1,000 ka mga tawo sa tulo ka adlaw nga Oplan Bulabog samtang mga menor de edad nga na rescue nanaghan.
Tungod niini, gipangmandoan ang mga hepe sa 11 ka police stations nga mobisita sa mga sitio aron mobadlong sa mga tawo nga naa nag-estambay sa gawas sa mga panimalay.
Sa datus sa Cebu City Police Office (CCPO), moabot ngadto sa 805 ka mga tawo ang nadakpan sa kapulisan atol sa tulo ka adlaw nga Oplan Bulabog nga gisugdan sa Biyernes, Enero 21, 2022 hangtod Dominggo sa gabii, Enero 23, 2022.
Sa maong gidaghanon, 94 niini mga menor de edad nga naabtan sa mga pulis, nga naa sa gawas naglaroy-laroy nga way importante nga gihimo; 711 ang mga hamtong, 178 wala mag facemask ug 592 ang nakalapas sa curfew.
Matod ni Police Lieutenant Colonel Maria Theresa Macatangay, information officer sa CCPO, nga nabantayan sa ilang hepe, Police Colonel Ernesto Tagle, nga misaka ang gidaghanon sa mga bata nga na rescue.
Tungod niini, gimandoan karon ang mga hepe sa 11 ka police stations nga matag adlaw mobisita sa mga sitio ug mga eskina diin naa ang problema sa pagsunod sa health protocol.
“So, our city director instructed the chiefs of police to visit the sitios, those mga small alleys kanang mga eskinita nga bisitahon sa atong mga pulis alang sa pag badlong sa atong mga kabatan-onan,” matod ni Macatangay.
Dugang nabantayan nila nga kasagaran sa mga menor de edad dili na mosul-ob sa ilang mga facemask sa pagpangawas nga sa daw mi relax na sa pagtuman sa minimum health standard.
GINIKANAN MANUBAG
Kon makita sa kapulisan sa Siyudad nga mag balik-balik na ang mga bata nga ma rescue, ila nang isyuhan og citation ticket ang mga ginikanan aron pamultahon kay wala nagpakabana sa ilang mga anak.
Awhag ni Macatangay sa mga ginikanan nga bantayan ang ilang mga anak nga menor de edad aron dili mogawas sa balay aron dili sila maoy mamahimong courier sa kagaw.
“Ipatawag na ang ilang mga ginikanan and then isyuhan gihapon sila og citations sa atoang teams nga gi deploy,” dugang ni Macatangay.
Ning nagpadayon nga pagsulbong sa mga kaso sa Covid 19 sa dakbayan, ang kapulisan mo tutok na sa mga barangay nga taas ang kaso.