Dili una mo-report si Mayor Michael Rama sa iyang buhatan human siya na-expose sa tawo nga nagpositibo sa Covid-19 sa nakalabay nga adlaw.
Si Cerwin Eviota, public information officer (PIO) sa Cebu City Government, nagkanayon nga ang gibuhat sa mayor preventive measure aron masiguro nga dili makatakod sa laing tawo.
Gitug-an usab niya nga nakapaubos na sa antigen test ang mayor kagahapon, Enero 24, apan hangtod niining pagsuwat, wala pa masayri kon positibo o negatibo ba.
Ang PIO nagkanayon nga sa balay nag-isolate si Rama ug nidistansiya usab siya sa dul-an duha ka tuig nga anak ug asawa.
Kon mogawas ang mayor, adto ra sulod sa sakyanan para pag-supervise sa gipatuman nga mga proyekto human sa bagyong Odette.
“He’s not staying home. He’ll also go out to check field works, like the output of Basura Clean-up Storm and Task Force Ratsada, among others,” dugang ni Eviota.
Ang mayor niatubang sa mga tigbalita kagahapon apan pinaagi sa Zoom meeting sanglit nanaganang daan si Rama aron dili makaduol sa mga tawo sanglit wala pa ang resulta sa iyang Covid test.
Gipasabot ni Eviota nga matag karon ug unya si Rama mopaubos sa antigen test hilabi na kon aduna siyay mga meeting diin personal silang motambong aron pagsiguro nga dili sila maoy nagdala sa virus hilabi na niining panahon sa pandemya.
Sa kasamtangan, ang Cebu City adunay 7,345 ka aktibong mgga kaso sa Covid-19 human laing 573 ka mga individual nagpositibo niadtong Enero 23 gikan sa 1,122 ka mga individual nga gi-swab test diin adunay 51.07% daily positivity rate.