Anaa sa talandugon nga kahimtang ang 12 anyos nga babaye ug iyang amahan human sila panigbasa sa ila ra usab nga silingan niadtong Lunes, Enero 24 sa gabii.
Ikatulong biktima ang laing silingan nga gi-apil sa pagtigbas sa suspek.
Ang kremin nahitabo sa Purok 7, Barangay Cogon, Dakbayan sa Bogo.
Ang mga biktima nga naka-angkon og nagkadaiyang samad tinigbasan gi-ila nga sila si Jypil Gallarde, 12; Randy Gallarde, 40, amahan ni Jypil, laborer; ug si Francisco Catamco, 61, silingan.
Samtang ang suspek mao si Amancio Barba Jr., 56, minyo, silingan ra sab sa mga biktima.
Tug-an ni Police Lt. Colonel Florendo Fajardo, hepe sa Bogo City Police Station nga ang mga biktima nga sila si Gallarde ug Catamco ang nagtagay og ilimnong makahubog.
Gikatahong kalit mibutho ang suspek nga si Barba ug way daghang pangutana gihapos ang gibitbit niining sundang ngadto sa mga biktima.
NAKADAGAN NA UNTA
Nakadagan pa si Gallarde apan misunod ang 12 anyos anak, samtang naggukod ang suspek.
Base sa imbestigasyon sa pulis nga naabtan sa suspek ang bata ug maoy iyang gipanghimungtan, hinungdan nga gi-apil og tigbas.
Tungod niini, mibalik sa agi si Gallarde aron sa pagtabang sa iyang anak nga maoy gitigbas ni Barba.
Natigbasan ang ulo ni Gallarde sa dihang suway nga miluwas sa bata.
Nagkasamad-samad sab ang kamot sa biktima sa pagsinagang sa hapos ni Barba sa sundang.
Adunay barangay tanod nga nilayog ni Barba apan nakasibat ang suspek.
Ang mga biktima gidali og dala sa Cebu Provincial Hospital, Bogo City.
Apan gibalhin ang amahan ug anak nga Gallarde sa Vicente Sotto Memorial Medical Center tungod kay kritikal ang ilang kondisyon.
NAGPA-BUKID
Sigun sa nakasaksi nga nakit-an si Barba nga misakay og Ceres bus niadtong Martes, Enero 25 sa kadlawon nga pwerting basaa.
Adunay nakatug-an nga minaog ang suspek sa lungsod sa Catmon ug giingong nagbaktas paingon sa bukid nga nagbitbit og sako.
Adunay nakamay-ong ni Barba sa dihang nakit-an ang Facebook post sa Tabuelan Police Station hinungdan nga nasundan si Barba.
Nasikop si Barba nianang pagka-hapon human sa gihimong joint hot pursuit operations sa Tabuelan Police Station ug Catmon Police Station.
HINUNGDAN
Mi-angkon si Barba sa maong kremin tungod kay naglagot siya ngadto sa manghod sa 12 anyos, laing anak ni Gallarde.
Gikatahong napungot ang suspek sa bata tungod kay gibato ang iyang balay, ug gisumbag niini ang menor de edad.
Miresulta sa pagpa-blotter sa kabanay sa bata nga gikasuko pag-ayo ni Barba.
“Gaba-id daw ni siya sa sundang sa wala pa ang kremin. Napaatbang kay nasuko og maayo kay gipa-blotter iyang pagpanagmal sa minor nga manghud sa 12 anyos,” saysay ni Fajardo.
Nasayran nga way maayong relasyon si Barba ngadto sa iyang mga silingan tungod sa pagkamasuk-anon niini.
Gani, makadagdan nang gireklamo ngadto sa ilang barangay.