Usa ka batan-ong babayeng pulis nirisgo sa iyang kinabuhi aron pagluwas sa 5-anyos nga iro nga natanggong sa edipisyo nga nagdilaab sa sa kayo sa Lunes sa hapon, Enero 24, 2022 sa Barangay Liloan, Santander, habagatang Sugbo.
Si Patrolman Mona Lee Saludar niasoy nga ang iro nagtago ilawom sa lamesa duol sa kusina sa Kingdom Resort samtang gilamoy sa kayo ang ikaduhang andana sa building.
"Nahadlok kaayo siya tan-awon ug naghangos na sa dihang nakita nako siya," ingon ni Saludar.Ang itom nga Labrador Retriever nga gihinganlan og Deabak usa sa tulo ka mga iro sa tag-iya sa resort nga sila si Sim Sunbo ug Han Eun Kyeung, parehong Korean nationals.
Didto sila sa dakbayan sa Dumaguete dihang nahitabo ang sunog. Nagsugod ang kayo sa ilang lawak sa ikaduhang andana diin nagpuyo ang ilang duha ka gagmay nga mga iro nga usa ka poodle ug usa ka shih tzu.
Sa dihang namatikdan sa caretaker ang baga nga aso gikan sa lawak, ilang giablihan ang pultahan ug ang duha ka gagmay nga mga iro midagan sa ubos ug migawas sa building.
Si Daebak nagpabilin sa ground floor ug nidagan usab dihang nagsugod ang sunog. Apan, naglibog siya ug mibalik sa sulod sa building.
Matod ni Saludar nga mga alas 2 sa hapon nakadawat sila og tawag sa police station bahin sa sunog. Ilang girespondehan ug pag-abot nila, wala na makontrolar ang kayo tungod kay ginama sa light materials ang ikaduhang andana. Iyang gipangutana ang usa sa mga empleyado sa resort kon wala bay tawo nga natanggong sa sulod.
Ang kawani nitug-an nga ang ilang Labrador anaa sa sulod ug wala sila mahibalo kon unsaon kini pagpagawas.
Matod ni Saludar nga iyang nakit-an si Daebak nga naglingkod lang ilawom sa lamesa ug gusto na kaayo siyang luwason ang iro.
“Ingon ko sa akong mga kauban nga akong sudlon ang iro. Giingnan ko nila nga dili na lang kay hapit na mahugno ang second floor pero di gyud nako kaya nga ako lang siyang pasagdan,” asoy niya.
Bisan pa sa peligro, nakahukom si Saludar nga luwason ang iro. Gibasa sa mga bombero ang iyang mga sinina aron mapugngan ang epekto sa kainit sulod sa nagdilaab nga building.
Giangkon niya nga nabalaka siya nga basig mahulgan siya sa nagdilaab nga mga debris apan determinado siya nga luwason si Daebak.
“Ako gigunitan iyang collar. Ni-resist sya sa una. Di siya mobarug. Ako gigakos, gihapuhap unya akong gistoryahan nga mogawas lang mi aron maluwas siya. Mao to, nikuyog na sya nako,” ni Saludar pa.
Sa gawas, iyang gihatagan og tubig si Daebak ug pagkataud-taud, iyang gibasa ang balhibo niini aron mapaubos ang temperatura sa iyang lawas. Pasado alas 5 sa hapon, niabot ang magtiayong Korean ug si Deabak, ingon man ang duha ka gagmayng iro, nakig-uban sa ilang mga tag-iya. Wala pa matino ang hinungdan sa sunog. Mokabat sa P1.5 milyones ang danyos.
Si Saludar, 26, nisulod sa serbisyo sa kapolisan niadtong 2018 ug human sa iyang pagbansay niadtong 2019, nadestino siya sa Police Regional Office (PRO) 7. Usa siya sa mga frontliner sa Covid-19 nga naka-lockdown sa mga lugar dihang nagsugod ang pandemya.
Niadtong Marso 2021, gi-reassign siya sa Santander Police Station. Ang policewoman, lumad nga taga lungsod sa San Remegio sa amihanan, gikan sa pamilya sa mga mahigugmaon sa iro. Nagdako siya nga adunay daghang mga Aspin, kadaghanan kanila mga laag nga miadto sa ilang balay aron mangayo og pagkaon.
“Mga wala’y tag-iya unya gikuto na intawn moadto sa amo. Sagopon man na namo. Among atimanon,” matod niya.
Karon, aduna na siyay duha ka Huskies, usa ka Golden Retriever, usa ka Shih Tzu-Poodle mixed ug lima ka Aspins.
Ang pagluwas kang Daebak bisan kon kini nagpasabot sa pagpameligro sa iyang kinabuhi maoy usa ka konkretong pamatuod nga siya tinuod nga mahigugmaon sa iro. (REV gikan sa PR)