DIDTO sa amoang probinsya sa wa pa mabaligya ang among karaang balay, daghan kaayo'g kaban nga karaan akong lolo, ang sulod sa maong mga “baul” pulos himan sa pamanday kay karaan man siyang panday ug duna sab mga karaang butang sama sa mga plato, kaldero ug naagop-opan nga mga karaang hulagway sa laing baul.
Ambot lang og naa pa ba'y mga ing-ani karon? Kay sa panahon baya sa pagsulbong sa teknolohiya, ang mga karaang butang gipang-displi nalang nga maoy kabahin sa adurno, ug ning kasamtangan, gipang-ilisdan na sab ang mga gipang-displi, kay lagi, sum-ol na kunong tan-awon.
Kapoy na suma pa og tigom ning mga butanga, pang “old school” kuno, ug di na daw haum sa kasamtangan nga panahon, maong ang pipila, napasagdan ug ang uban naadto sa “bote-bakal,” kasakit paminawon, pero unsahon ta, nabiyaan naman sila sa panahon.
Naa sab kisaw karon sa social media, kining Tallano Gold, ug kining “Yamashita Treasure” diin nalakbitan niini ang mga Marcoses.
Na-drawing man gud sa hunahuna sa mga Filipino nga dunay daghang bulawan ang mga Marcos, apan kining tanan, gilimod daw ni Sen. Imee Marcos?
Giingong "Urban legend" ang tawag niini ni Imee, ang mga istorya mahitungod sa giingong pagpanag-iya sa iyang pamilya og tone-toneladang bulawan, gikan man sa Yamashita Treasure o Tallano gold?
Butang nga giingong natingala kuno kining si Imee nganong ipahid man gyod daw sa iyang pamilya ang daghang mga bulawan nga wala man kuno sila'y bisan usa nga nakit-ang Yamashita Treasure ug Tallano Gold.
Daghan sab kuno ang mga nailad sa Tallano Gold sa Quezon City, Caloocan ug Pangasinan. Dilikado'g magamit ni sa laing interes diha sa eleksyon? Basin manggawas ang giingong Tallado Gold sa mga politiko, aron linglahon lang ang mga botante?
Daghan baya gyod pod og mga ilad ining social media, mahimo ang tanan ingon ug alang sa kaugalingon nga katuyoan, busa mag-amping kita, mas maayong subayon gayod pag-ayo ang tinubdan sa post ug kinsa sila ug unsay gimbug-aton sa ilang posisyon sa pag-post sa susama.
Naa koy kaila nga modaghan lang ang bulawan nga ipang-adurno sa lawas kung panahon sa Pasko ug Bag-ong Tuig ug kung ting-loan niya, manabi man pod, kay kana daw nga mga panahon daghan daw siya'g kuwarta. Hahahaha.
Kamo unsay mga bulawan diha sa inyong kinabuhi? Lagmit pamilya gayod, di ba? Ug ang uban, materyal sab gayod, kanang ma-prenda og hagip-ot na sa panudlanan.
Usa lang ang bulawan sa akong kinabuhi, mao ang pagtuo sa Diyos, sa labing Manluluwas, -- sa imong kinabuhi, sa imong pagtuo, gumikan walay mopukan niini kung hingpit gayod ang pagsalig nimo Kaniya.
Dapita sa kanunay ang kinabuhi ngadto sa pagtuo sa Diyos, salig sa kaugalingon ug ang pagbutang sa kasingkasing diha sa kahingpitan.