DAGHAN karon ang supak sa "no vaccine, no ride" policy human nga migula sa nasyonal ang maong hisgutanan, butang nga gikaalarma sa mga drayber basin unya mapatuman gayod kini.
Sumala sa drayber sa Route 2 sa Davao City nga si Renato Javier, 56-anyos, nga kung mahitabo kini sa Davao City, lagmit makuhaan ang ihap sa mga pasahero gumikan daghan pa karon ang wala nagpabakuna kontra Covid-19.
Diskriminasyon, suma pa, ni Javier ang maong lakang butang nga seguraduhon unta sa awtoridad kung unsay sangputan niini una ipatuman.
"Discrimination kini sa ubang pasahero labi na kadtong wala gyud nagpabakuna gumikan supak sa ilang pagtuo," ingon sa drayber sa public utility jeepney (PUJ).
Supak sab ang grupong Bayaning Tsuper Partylist (BTP) ug gipasabot niini nga husto na ang paggamit og facemask ug passenger reduction aron nga mapabilin ang social distancing.
Sumala ni Bayaning Tsuper Partylist first nominee Atty. Alex Abaton sa pakighinabi kaniya sa Halo-Halo Radio sa Davao City sa miagong semana nga uban sila sa panon sa mga supak sa "No vaccine, No ride" policy, ug suma niya di angay maguol ang mga drayber aron di makibhangan ang ilang mga kita.
Kung mahitabo ang "No vaccine, No ride" policy, lagmit moubos ang ihap sa mga manakayay ug usa suma pa kini sa pag-discriminate sa usa ka pasahero.
Si Abaton ug ang mga drayber daw susama og panglantaw ug baruganan, diin gipasabot sab ni Abaton nga di kinahanglan masilutan ang mga drayber nga magpasakay og mga unvaccinated passengers.
Dugang sa opisyal nga kung mapatuman kini, imposible sab kuno nga mahimo pa sa usa ka drayber ang pag-usa-usa og hiling sa iyang mga pasahero kung kinsay nabakunahan o wala nabakunahan.
Sa Metro Manila, dunay mga law enforcer ang nagpatuman niini apan sa mga pili ra sab nga mga oras, butang nga gikasubo sa drayber.
"Ningas-kugon man kaayo ang implementation, maayo lang og naay mo-cover nga media sa ilang unang pagpatuman kunuhay, pagkaugma wa na, mas maayong di nalang na ipatuman, dako kaayong diskriminasyon," sumpay sa drayber sa Route 2 nga nahinabi sa Superbalita Davao.
Una niini, gihangyo sab ni Davao City Mayor Sara Duterte ang mga opisyal sa barangay sa Davao City nga dili balibaran diha sa serbisyo ang mga residente nga dili bakunado kontra Covid-19.