Dunay giingon nga kon mamakak man lang gani, seguradohon gyod nga di masakpan ang pamakak. Kay kon masakpan ang bakak, wa na gyod motoo pa bisan magsulti na sa tinuod.
Mao kini nahitabo sa usa ka politiko.
Nisulti siya nga naguba ang iyang balay sa bagyo, maong nagkinahanglan siya nga mopuyo sa usa ka hotel.
Namakak man diay. Nakuhaan og drone picture ang iyang balay ug makita nga wala ra man diay maguba.
Sakspan, matod pa.
* * *
Misulti pod siya nga kon di gani motabang ang gobiyerno sa mga nabiktima sa bagyo, hayan moresulta sa pangawat o looting unya segurado nga magubot gyod ang katawhan.
Daghan ang natingala sa iyang gisulti tungod kay siya ra man ang nanghulga pero daghan man unta ang nabiktima sa bagyo.
Human molabay ang pipila ka adlaw ug semana, walay pangawat o looting nga nahitabo ug wala pod magubot ang mga tawo bisan wala pa moabot ang ayuda gikan sa kagamhanan.
Sakspan na pod ang pamakak.
* * *
Sa dihang gipangutana sa Presidente kon aduna bay mga kadaot ang pipila ka mga kalungsoran human sa bagyo, abtik kaayo nga mitubag og walay kadaot.
Ang sipyat niya kay nag-chopper man diay ang Presidente ug nakita ang tumang kadaot human sa bagyo.
Buking na pod. Ang nakapait kay mismo ang Presidente ang mibuking sa iyang pamakak.
* * *
Sa dihang gipangutana siya kon unsa iyang gihimo nga tabang sa mga nabiktima sa bagyo, dali kaayo misulti sa iyang mga plano nga buhaton pero di pa niya mahimo kay wala kunoy kwarta.
Asa man diay ang imong gipangutang nga binilyon gikan sa mga bangko, nangutana ang Presidente. Wala siya magdahom nga nahibaw-an diay sa Presidente ang iyang mga gipang-utang.
Buking na pod.
* * *
Duna pay lain pamakak.
Daghan ang mihatag sa ilang mga donasyon, apil na niini ang mga generator sets, pagkaon, tubig ug uban pa, alang sa mga nabiktima sa bagyo.
Nagtuo ang kadaghanan nga ihatag dayon ang mga donasyon kay gikinahanglan kini sa katawhan.
Apan nalangan gyod.
Ang rason – una, wala pa mahuman og print ang mga stickers nga nagpakita sa nawong sa politiko kay ipapilit kini sa mga donasyon. Ikaduha, agdon ang iyang schedule kay kinahanglan naa siya sa pagpanghatag, di mahimo nga ihatag ang mga donasyon kon wala ang politiko.
Gusto niya ipalabas nga gikan niya ang maong donasyon nga ang tinuod, dili ra ba kay hinatag kini sa mga naluoy sa mga biktima sa bagyo.
Tungod kay nasakpan na man siya sa iyang mga pamakak, wa nay ganahan motuo sa iyang isulti, bisan pa tingali og mosulti pa siya sa iyang tinuod nga pangalan.