Base sa gipagawas nga press release sa Visayan Electric (Veco) karong bag-o nga mokabat sa 80 porsiyento sa ilang power supply ubos sa ilang franchise area ang mibalik na sa pagsiga. Buot ipasabot nga 20 porsiyento na lang ang nahibilin sa dili pa mahibalik sa hingpit ang ilang supply.
Ambot og pila ka semana pa kining trabahuon sa ilang mga linemen aron makompleto gyud ang paghibalik niini. Dakodako man gyud ning franchise sa Veco. Daghan pa akong nadawat nga mga reklamo nga daghan pang wala mabalik ang ilang elektrisidad. Huwat-huwat lang mo, mo-abot ra lagi na.
Samtang mao kini ang situwasyon sa Veco, ang Mactan Electric Company (Meco) nga mao ang nagserbisyo sa Mactan island daghan ang nagbagutbot kay hangtod karon wala pa gihapon masug-i ang dakong bahin sa isla. Daghan kog nabasahan sa FB nga akong mga kaila nga nagyawyaw gumikan kay kapin sa buwan na human miigo og mikusokuso ang bagyong Odette, wala pa mabalik ang ilang kuryente.
Asa naman kuno ang taga Meco? Naa ra man ang taga Meco siguro pero ang pangutana kon paspas ba ang ilang trabaho?
Dakodako usab ang danyos nga nahi-aguman sa Meco og ambot nahatagan ba sila og augmentation force sa mga linemen gikan sa Meralco, Davao Lights, Subic og sa Cotabato. Basin diri lang sa Veco franchise area ang nahatagan og augmentation force. Kon nahatagan man, pila pod kaha? Di kaha maayong buhaton sa taga Meco nga mapaspasan nato gamay aron daling mobalik ang pagtuyhakaw sa ekonomiya sa entiro isla sa Mactan? Morag bao kuno ang Meco.
TUBIG, TELCOS
Dili lang ang elektrisidad ang nagproblema gihapon kon dili apil gihapon ang tubig ug telecommunication. Dili man sa ingon nga nag-asyoso ta kay mabuhi man kita kon wala kining nga butanga. Apan nahimo naman kining tipik ug kabahin sa atong kinabuhi. Nagkaproblema man gani ang tubig bisan wala pa niadtong bagyo, labina gyud human sa bagyo nga apektado ang kuryente. Nagpadayon gihapon karon ang rasyon.
Mao usab kanay nahitabo sa atong telecommunication. Aduna pay pipila ka mga lugar nga wala mabalik ang ilang mga telephone lines,cellular signal ug wi-fi. Sa GMA 7 complex lang, wala pa gyud mabalik bisan lang ang among mga telepono. Nahibalo naman mo kon unsa ka importante ang telepono sa radyo ug TV station. Cellular signal walay klaro. Nagyaya lang pod ning mga telcos? (bobbygnalzaro@gmail.com)