Nagtuo si Lapu-Lapu City Mayor Junard Chan nga propaganda o pamolitika lang ang pangangkon sa duha ka mga sakop sa konseho sa dakbayan nga nakadawat og hulga sa ilang kinabuhi.
Sa sayo pa, sila si Konsehal Michael Dignos ug Flaviano Hiyas mnipahibawo atol sa gipatawag nga press conference niadtong Lunes, Enero 24 nga nakadawat sila og death threat nga gipaagi sa text message.
Ang duha ka mga konsehal nasakop sa opposition bloc ug nagkanayon nga ilang nadawat ang hulga human nga ilang gisukit sukit ang budget allocation sa Siyudad ug ang pagpangayo og liquidation report sa Covid-19 funds.
Nagduda si Konsehal Hiyas nga may kalabutan ang kampo sa administrasyon sa maong pagpanghulga.
“Ila nang propaganda na nila. Ang ilang propaganda magsige lang og daot dire nako,” tipik sa pamahayag ni Chan.
Apan si Konsehal Dignos sa iyang bahin miklaro nga di ti-aw ang hulga sa kinabuhi nga ilang nadawat.
“Dili jud na pwede i-joke or propaganda kay sagrado ang kinabuhi. Siya siguro maka sulti ana kay binuhatan niya kusug kaayo og propaganda,” tipik sa chat message ni Dignos.
Unang nang namahayag si Mayor Chan nga wa siyay panahon sa pamolitika nga mga pagpangdaot gikan sa iyang kaatbang.
Matod pa nga busy siya sa pag-atiman sa problema sa siyudad ilabi na ang pag-apod apod sa financial assistance ngadto sa Oponganon nga apektado sa Bagyong Odette sa miaging buwan.
“Kon maminaw ko sa ilang pangdaot, ma-ungot ko diha. Diay nagpaabot nako nga trabahuon, dako kaayo nga problema nga akong sang sulbaron,” pamahayag sa mayor.
“Ang propaganda hinuon kana iyang gi-angkon ang P5,000 nga ayuda ug wa niya tagai sa sakto nga information ang katawhan diin siya anang kwartaha,” dugang pa ni Dignos.
Tubag sa mayor nga wa siya mangankon apan siya nagpakilimos ngadto sa nasudnong kagamhanan nga kahatagan og dugang hinabang pinansiyal nga ipuno sa financial assistance niadtong nabiktima sa katalagman.