Ang Emergency Operations Center (EOC) nakatala og daghang recoveries itandi sa natakdan sa Covid-19 atol sa ika-upat nga pagsulbong sa kaso sukad niadtong Enero 1, 2022.
Si City Councilor Joel Garganera, deputy chief implementer sa EOC mitug-an nga adunay 302 ka bag-ong kaso sa Covid-19 samtang 442 ka mga tawo ang naayo sa maong virus niadtong Enero 24.
Gihulagway ni Garganera nga base sa ilang graph, miabot sa 7,370 ka aktibong mga kaso nga maoy labing daghan sa niaging mga adlaw.
Mi-ubos ang maong gidaghanon nga anaa na sa 6,973 ang aktibong kaso, samtang 27 na ka mga kinabuhi ang nakalas.
Apan gihulagway sa konsehal nga dili pa kini ang final nga timailhan nga paubos na ang umaabot nga bag-ong kaso sa virus base sa pamahayag gikan ni Mayor Michael Rama.
“It a’int over until it’s over,” matod ni Garganera.
Sa mga aktibong kaso, daghan ang adunay symptoms sa mga nagpositibo sa Covid-19 gikan niadtong Enero 1 hangtod Enero 24, 2022. Sa 80 ka barangay sa Cebu City, ang barangay Buot ug Paril ang nagpabilin nga walay gika-report nga transmisyon sa maong virus.
Sa 78 ka barangay nga adunay Covid-19 cases, 22 niini ang adunay milabaw sa 100 ka kaso nga nag-una sa barangay Guadalupe (678), Lahug (424), Tisa-(331), Apas (326), Capitol Site (288), Talamban (284), Labangon (282), Camputhaw (267), Mabolo (254), ug Sambag-II (219) nga top 10 barangays nga adunay labing daghan og kaso sa nakalabay nga 10 ka adlaw.