Kining pagsaka og balik sa mga kaso sa Covid-19 sa nasod karon gituohang tungod sa Omicron variant. Paspas kini motakboy apan, matod sa mga batid sa medisina, dili kini isog nga variant sama sa nahiunang genome o matang sa virus lakip sa Delta variant.
Samtang, ang programa sa gobiyerno sa pagpamakuna nakabwelo na. Daghan nang bakunado. Bisan dili kini kasegurohan nga di na matakboyan ang maong virus, apan dako og matabang sa pakigbatok sa virus ug layo ang posibilidad nga mograbe o makabsan sa kinabuhi.
Ang Department of Health (DOH) uban sa National Inter Agency Task Force (IATF) ningtugot na sa home isolation o quarantine sa assymptomtic ngadto sa mild nga kaso. Nagpasabot nga di na kaayo kabalak-an ang bag-ong variant. Gawas pa, migawas na usab karon ang tambal sa Covid-19.
Sa ubang adunahang nasod, dunay kabag-ohan ang ilang konsepto sa Covid-19 tungod usab sa kalamboan sa tambal. Ang pagdawat ug pagpakabuhi uban sa hulga sa virus. Numero uno nga panagang sa virus mao ang pagmintinar sa himsog nga panglawas panaagi sa balanse nga pagkaon ug pahuway.
Ang aktibong pag-implementer sa Emergency Operations Center (EOC) sa dakbayan sa Sugbo, City Councilor Joel Garganera, nikompirmar nga minus ang naospital sa dakbayan human nga kadaghanan sa mga kaso dili grabe ug kasagaran gipaubos sa home quarantine.
Ug ang tanan dunay kataposan, matod pa. Ang pandemiya sa tibuok kalibotan dul-an na sa tulo ka tuig. Manghinaut kita nga naa na kini sa iyang kataposang hunat. Dili seguro hingpit mapapas, apan basin mahisama na lang kini sa ubang komon nga sakit nga kanunayng hulga sa atong panglawas.