Labing una nga drug den nga gironda sa mga ahente sa Philippine Drug Enforcement Agency (PDEA)-7) karong tuiga nahimutang sa Sityo Kalyehon, Barangay Labangon, Dakbayan sa Sugbo.
Si Leia Alcantara, tigpamaba sa PDEA 7, nibutyag nga alas 8:30 sa gabii sa Lunes, usa sa ilang mga team mipahigayon og ronda sa drug den nga niresulta sa pagkasikop sa lima ka mga tawo.
Ang mga nadakpan nailhan nga sila si Jingle Villanueva Misa, alyas Jingle Villanueva, 35, tag-iya sa kwarto nga gihimong drug den.
Lakip nga nadakpan ang duha ka mga lalake nga sila si June Labingco, 33; Benjamin Alcontin, 32; ug mga babaye nga manghud ug ig-agaw sa kapuyo ni Jingle nga sila si Jessel Manton, 22; ug Marriane Jandog, 20, samtang ang kapuyo sa suspek nga si April Jandog giingong nakadagan dala ang halin sa drugas.
Atol sa ronda, nasakmit sa mga operatiba ang shabu nga moabot og 15 gramos nga mobalor og P102,000. Si Misa, matod pa, makabaligya og drugas nga 50 gramos matag semana.
Dugang ni Alcantara nga ang ronda sa panimalay ni Villanueva base sa sumbong sa programang “Isumbong Mo kay Wilkins.”
Kasong kalapasan sa Republic Act 9165 kun Comprehensive Dangerous Drugs Act of 2002 ang ipasaka batok sa mga suspek.