Daghan pa gihapon ang wala mopatuo sa lagda nga giluwatan ni Cebu City Mayor Rama nga “Oplan Puyo Gihapon” tungod kay daghan pa ang nangadakpan panahon sa Oplan Bulabog sa kapulisan matag adlaw.

Sa datus sa Cebu City Police Office, nga gipahibawo ni Police Lieutenant Colonel Maria Theresa Macatangay, moabot ngadto sa 223 ka mga tawo ang nadakpan, 167 niini mga hamtong na samtang 56 ang nasita nga mga menor de edad, 179 ang nakalapas sa curfew samtang 38 ang naabtan nga way facemask.

Matod ni Macatangay nga misaka ang gidaghanon sa mga bata nga nasita nga nanggawas sa ilang panimalay nga naa lang sa gawas nag estambay.

Kasagaran kanila walay gisul-ob nga facemask nga usa sa nakita karon nga problema sa kapulisan.

“These minors nga gisita are those nga walay essential activity or purpose sa pag gawas nila sa ilang panimalay. Nagtambay ra, nag tabi ra and then walay mga facemask. Naa say uban sad nga mga minors nga maski curfew na, naa pa gigapon sa gawas,” matod ni Macatangay.

Gumikan niini, nihangyo ang kapulisan sa dakbayan ngadto sa mga barangay officials nga abagan sila sa pagpatuman sa executive order sa mayor sanglit sila mismo nasayod sa sitwasyon sa ilang dapit diin daghan sa ilang mga residente nanggawas bisan dili angay.

Giangkon ni Macatangay nga tungod sa kadako sa siyudad sa Sugbo dili nila ma lukop sa pag roving ang mga sudlonong bahin sa matag barangay kon walay abag sa mga tanod.

“Nindot gyud unta nga ang atong mga barangay officials motabang sa atong kapulisan nga even on their own they will initiate measures to implement the Oplan Puyo of the mayor because tungod kay kini man gud nga atoang activity atong operation dili man maka daot kay makaayo man. So hopefully they will initiate measures on their own, dili magpaabot lang sa police nga mo organize usa pa sila mo react,”dugang ni Macatangay.

Sa wala pa hingpit nga mipatuman sa adlaw ug gabii nga Oplan Bulabog ang 11 ka police stations, nihimo sila og recorida aron ipahibawo sa mga lumolupyo sa matag sitio nga magsugod na silag panakop niadtong molapas sa kamandoan sa mayor.

Nanghinaot ang CCPO nga motuman niini ang mga Sugboanon tungod kay estriktohon na nila ang pagpanakop sa magmagahi sa pagtuman kay misaka na pag ayo ang mga kaso sa Covid-19.

Gipang monitor na usab nila ang mga establisemento sama sa malls ug dagkong mga tindahan kon gipatuman naba usab ang no vaccine card, no entry lakip na ang pag dili sa mga nag pangidaron og 12 anyos paubos.