TACURONG CITY -- Padayon ang gihimong imbestigasyon sa kapulisan sa Isulan Municipal Police Station sa brutal nga pagpatay sa inahan ug iyang menor de edad nga anak lalaki niadtong Martes sa hapon, Enero 25.

Giila ang biktima nga si Noralyn Delfin Eribal ug iyang menor de edad nga anak, molupyo sa Barangay Kalawag 2, Isulan, Sultan Kudarat.

Sa taho nga nahagpat gikan sa Isulan MPS nga unang nakaplagan sa mga paryente ang patay nga lawas ni Noralyn nga naligo sa kaugalingong dugo sulod sa iyang kuwarto.

Hubo ang lawas niini nga nakaangkon og daghang samad dinunggaban sa nagkadaiyang parte sa lawas.

Patay sab ang anak niini nga lalaki nga nakaplagan sulod sa iyang kuwarto nga gitusak-tusak sa pagdunggab.

Daghan ang nagtuo nga posibleng gilugos si Noralyn una siya gipatay kung diin ang bana niini tua sa trabaho.

Nasuta sab sa mga imbestigador sa Isulan Municipal Police Station nga daghan ang nangawala sulod sa balay sa pamilyang Eribal.