CATEEL, Davao Oriental -- Patay na sa dihang nakaplagan sa mga sakop sa kapulisan ang usa ka byuda sa bukirang bahin sa Barangay Malibago, alas 8:00 sa buntag niadtong Sabado, Enero 22, 2022.

Giila ni Police Major Randy Galicia, chief sa Cateel Municipal Police Station, ang biktima nga si Rosalie, 42-anyos, mag-uuma ug nagpuyo sa Sitio Manusa, Barangay Malibago, Cateel.

Base sa report sa Cateel Municipal Police Station, midangop sa ilang buhatan ang usa ka Erma Platina aron i-report nga ang iyang bayaw nga si alyas Toting miabot sa ilang balay alas 4:00 sa hapon niadtong Biyernes, Enero 21, aron nga mangayo og tabang kay gidagit sila sa usa ka ginganlan og alyas Joel Magquidong, Veloso Magquidong ug alyas Jaguar.

Si Toting, kauban ang biktima nga si Rosalie ug ang ilang pag-umangkon nga 16-anyos, ang gipangdagit ug gibuhian lamang si Toting aron mokuha sa kuwartang gipangayo sa mga suspetsado nga P300,000 aron buhian ang duha niini ka mga kauban.

Hinungdang gikasa sa mga sakop sa Cateel Municipal Police Station ang rescue operation, kauban ang mga personahe sa 1st DOPMFC sa pagpanguna ni Police Lieutenant Melchicidec Padamong ug ni Police Lieutenant Elmer Tolin, Deputy Chief of Police ug ang 67IB sa Philippine Army sa maong lugar.

Apan alas 6:00 sa gabii sa susamang adlaw, nakaikyas ang 16-anyos.

Naabtan nila sa lugar ang biktima nga nagbuy-od sa sagbutang bahin ug wa nay kinabuhi, may samad nilaslasan sa liog.

Narekober pud ang usa ka sundang duol sa patay'ng lawas sa biktima.

Mga suspek gidudahang misibat paingon sa Barangay Simolao, Boston, Davao Oriental.

Apan pinaagi sa hot pursuit operation, Enero 25, 2022, nadakpan sa mga awtoridad ang mga suspek nga nailhang sila si Veloso Magquidong, 59-anyos; Joel Magquidong, 38-anyos; ug Franklin Medija, 47-anyos.

Kasong murder, robbery ug serious illegal detention ang kasong ipasaka batok sa mga suspetsado. (JPC/uban sa taho ni Cheche Diabordo, KAMM Media Network)