GIPAILAWOM sa Police Regional Office (PRO)-Davao ang unom ka mga lugar sa rehiyon ubos sa election watchlist of areas (EWAs) tungod sa posibleng mga kasamok nga dunay kalambigitan sa eleksiyon.

Gikanayon ni PRO-Davao spokesperson Police Major Eudisan Gultiano atol sa virtual presser Myerkules, Enero 26, nga mga lugar ubos sa EWAs mao ang Pantukan ug Monkayo sa Davao de Oro; ug Digos City, Matanao, Kiblawan, ug Magsaysay sa Davao del Sur.

Giesplikar ni Gultiano nga apil sa mga hinungdan nga usa ka lokalidad ipaubos sa "watchlist" naglakip sa kaagi nga kasamok nga dunay kalambigitan sa eleksiyon ug ang presensiya sa nagkadaiyang mga armadong grupo nga posibleng masabwag og kayagaw sa eleksiyon.

"These include potential threats sa (among) election candidates, intense political rivalries among parties and candidates, presence or employment of partisan armed groups, and criminal gangs, proliferation of loose firearms, activities and capabilities of CTG [communist terror groups] and LTG [local terror groups] and other threat groups in the area, and mga ibang factors kasama na ang (ubang hinungdan) surge of Covid-19 cases," sumala sa opisyal sa PRO atol sa AFP-PNP Press Corps Southern Mindanao virtual presser.

Sa bahin sa Monkayo, ang tigpamaba nagsulti nga dunay kaguliyang nga dunay kalambigitan sa eleksiyon sa miaging panahon tungod sa away sa mga karibal sa politika sa mga kandidato, samtang ang ubang lugar sa Matanao, Kiblawan, ug Magsaysay gipaubos sa EWAs kay naa kini sa hilit nga lugar, kon diin ang presensiya sa terror groups posibleng maoy hinungdan sa hulga ug kahadlok atol sa eleksiyon.

Puno pa niya nga kini nga mga lugar gipaubos sa "immediate concern" base sa ilang pagsusi. Hinuon matud niya nga posibleng madugangan ang listahan kung magsingabot na ang Mayo 2022 nga eleksiyon.

Giklaro sa opisyal nga ang mga watchlist areas lauman nga dunay pagpahugot sa police visibility naglakip sa pagmuntar og mga checkpoints, aron nga maseguro ang kaluwasan ug seguridad sa mga botante ug malikayan ang pag-ulbo sa away sa eleksiyon.

Gilakip sab ni Gultiano ang pagsulbong sa Covid-19 sa pipila ka mga lugar sa sukdanan sa Commission on Elections (Comelec) sa pagdeklara sa lugar nga ubos sa EWAs.

"We also consider that in determining how many police should be deployed because we need to control, we need to help them monitor and give warnings to all personnel in the area in the implementation and observation of health protocols," tin-aw pa niya.

Sa pagkakaron, matud niya, wala pay mga lugar nga gipaubos sa "election hotspot" kay wala pa silay nadawat nga mga taho og "grave political instability" sa rehiyon.

Miepekto niadtong Enero 9, gisuspende na sa Comelec ang permit to carry firearms outside of residence alang sa mga sibilyan subay sa gun ban alang sa eleksiyon. Kini nahisubay sa Comelec Resolution 10728.