Wa nay basura sa Siyudad sa Sugbo nga nagtipun-og sa South Road Properties (SRP) ug nahibalik na sa naandan ang pagpanghakot Siyudad.
Ang nahabilin mao na lang ang gamay nga debris sa bagyo nga mahimo lang pasagdan nga madunot kay di man manimaho.
Busa, niadtong Lunes, Enero 24, 2022, giputol na sa Dakbayan sa Sugbo ang pag-abang og mga dumptruck ug mga heavy equipment aron motabang sa paghakot sa mga debris ug basura human moigo ang bagyong Odette niadtong Disyembre 16 sa miaging tuig.
Matod ni Cebu Councilor Jerry Guardo, chairman sa logistics sa road clearing sa Dakbayan, nga ang naandang pagpanghakot sa mga basura sa Dept. of Public Services (DPS) ug mga barangay nahibalik na.
Ang mga barangay sa south sa Cebu City adto na mobilin sa ilang mga basura sa transfer station sa Inayawan sa di pa dad-on sa landfill sa Brgy. Binaliw, bukirang dapit sa dakbayan.
Ang mga barangay sa norte modiretso na og labay sa ilang basura sa Binaliw.
Ilang gipaspasan og maayo ang paghakot sa mga basura human mohangyo ang mga locator sa SRP.
Matod ni Guardo nga wa pa nila masayri kon pila ka tonelada nga basura ug debris ang nahakot sa Siyudad kay wa pa makahatag kanila ang ARN Central Waste Management, tag-iya sa landfill.
Wa pa usab nila masayri kon pila ang nagasto sa Siyudad alang niini, kansang bayranan gibase sa Association of Carriers and Equipment of Lessors (ACEL) rate nga gitugot sa Commission on Audit (COA) ubos sa “emergency procurement.”
Matod ni Guardo nga gikuha pa ni Cebu City Administrator Engr. Maria Suzanne Ardosa ang tanang data nga basehan sa pagbayad sa Siyudad.
Ang Siyudad nagbayad og P2,500 matag oras sa dumptruck samtang P1,500 ang oras sa mini dumptruck.
Tag P3,400 ang oras usab alang sa payloaders ug P1,800-P2,000 sa skid loaders.
Si Guardo niingon nga mas nakadaginot ang Siyudad kay ang mga kompaniya nga nanag-iya sa mga heavy equipment mao na ang migasto sa fuel ug drivers.
OPLAN RATSADA
Niadtong Sabado, Enero 22, giumol ni Rama ang Oplan Ratsada aron maoy molimpyo sa spaghetti wires nga wa pa matagad sa mga telco sukad sa pag-igo sa bagyong Odette.
Matod ni Guardo nga ang Ratsada gilangkuban sa DPS, City Disaster Risk Reduction and Management Office (CDRRMO) nga gipangulohan ni retired Bureau of Fire Protection (BFP) Gen. Aderson Comar, Quick Response Team (QRT) niini, Cebu City Transportation Office (CCTO) ug Parks and Playgrounds Commission.
Ang konsehal niingon nga nakita sa mayor nga daghan pang cable wire nga nagpasad ug nangumbitay sa karsada nga naghatag og kakuyaw sa mga motorista mao nga gusto niya kining malimpyuhan.