KAPIN sa P2 milyunes nga balor sa illegal nga drugas ang nasakmit sa kapulisan sa siyudad sa Sugbo ug 35 ka mga drug personalities ang nadakpan sa usa ka adlaw nga simultaneous anti-criminality law enforcement operation (SACLEO) niadtong Sabado, Enero 22, 2022.
Sa 35 ka drug personalities nga nadakpan, 14 niini mga high value individual ug 19 ang street level, lakip na duha nga wala malakip sa listahan sa Cebu City Police Office.
Nasakmit nila ang 406 gramos sa gituohang shabu nga mokantidad ang tanan og P2,766,172.
Nakadakop usab sila og 56 ka mga sugarol nga naatlan nga nagsugal sulod sa 32 ka anti illegal gambling operations sa 11 ka police stations ug special units sa CCPO.
Siyam usab ka most wanted persons ang ilang nadakpan pinasikad sa warrant of arrest nga giluwatan sa korte.
Matod ni Police Lieutenant Colonel Maria Theresa Macatangay, information officer sa CCPO, nga bisan naka tutok sila karon sa pagpatuman sa minimum health standard nunot sa pagsaka sa kaso sa Covid-19, wala usab nila biya-i ang anti criminality operations hinungdan nga daghan silag nadakpan.
Dugang ni Macatangay nga wala mohunong ang mga pulis sa ilang kampanya batok sa krimen samtang padayon usab ang ubang mga personnel sa pag panakop niadtong milapas sa lagda sa health protocols.
Magpadayon pa kini bisan nabutang sa peligro ang kahimtang sa panglawas sa mga pulis tungod kay kon pasagdan lang ang mga nalambigit sa illegal nga kalihukan, magbaha ang drugas sa dakbayan.
“So, kana siya non-stop ang trabaho sa atong kapulisan sama sa police visibility, crime solution, investigation mga reklamo nga moabot sa police stations, apart ana ang pag atubang aning pandemya,” matod ni Macatangay.