LAING lima ka mga barangay sa Dakbayan sa Sugbo ang makadawat sa hinabang nga bugas gikan sa Dakbayan karong adlawa, Huwebes, Enero 27. 2022.
Apan lahi sa nangaging mga pagpanghatag, ang matag putos ipanghatod na ngadto sa matag sa balay sa matag beneficiary aron kalikayan ang mga panagtapok.
Mao kini ang kamandoan ni Mayor Michael Rama taliwa sa padayong pagsaka sa mga kaso sa coronavirus disease 2019 (Covid-19) sa Dakbayan sa Sugbo.
Hinuon, dunay gamay nga seremonyas nga ipahigayon matag barangay nga tambungan lang sa pipila ka mga tawo.
Human niini, sugdan ang pagpanghatag sa bugas.
Ang mga barangay nga hatagan naglangkob sa Calamba, Ermita, Kinasang-an, Pahina Central ug San Nicolas Proper, pahibawo sa Cebu City News and Information, news portal sa Cebu City local government unit (LGU).
Kon dunay mga pangutana kabahin sa ayuda, pangutana sa barangay officials, Mayor’s Information and Liaison Office (MILO) o sa Department of Social Welfare and Services (DSWS).