KAPULISAN sa dakbayan sa Sugbo nipasalig nga mohatag og siguridad sa mga sakop sa Cebu media nga nakadawat og hulga sa kinabuhi ning nagkaduol na ang piniliay nunot sa kamandoan ni PNP Chief Police General Dionardo Carlos.

Si Carlos mitudlo og 133 ka mga public information officers nga mahimong magsilibing point persons alang sa media security.

Gipasalig sa PNP chief nga mohimo silag dinalian nga aksyon kon adunay mga sakop sa media nga makadawat og hulga sa kinabuhi.

Si Police Lieutenant Colonel Maria Theresa Macatangay, information officer sa Cebu City Police Office (CCPO) nagkanayon nga andam sila mga mo bantay sa mga sakop sa media sa Sugbo sanglit giila nila ang mga journalist nga kaabag sa kapulisan.

Iyang gipahibawo nga kon adunay modangop sa CCPO nga sakop sa media nga nakadawat og hulga sa kinabuhi, ila kining ipaagi sa proseso sama sa ilang gihimo sa uban nga ipaubos sa threat assessment.

Kon masuta nga tinuod ang hulga sa maong media personality mohatag silag personnel nga maoy mobantay sa magsisibya ug ilhon kinsa ang nag himo sa pagpanghulga.

“We have to assess if threats really are validated and there are really threats, and they should be substantiated by other members of the media as well, para walay gitawag nato ba nga special treatment,”matod ni Macatangay.

Gibutyag ni Macatangay nga sa pagkakaron wala pay miduol sa iyang opisina nga sakop sa media sa Sugbo nga nagpatabang tungod kay nakadawat og hulga sa kinabuhi.

Labing maayo nga kon aduna man, ipaabot dayon kini kanila aron mahatagan dayon nila og dinalian nga pagtagad ug maproteksyonan ang magsisibya.

Sa miaging tuig duha ka blocktimers sa radio ang gipang pusil nga silang Reynante Cortes ug Rico Osmeña.